Shillong, Jylliew 28: Hapoh ka jingpyniaid jong ka North East Student’s Organisation (NESO) mynta ka sngi baroh ki seng samla pule jong ka thain shatei lam mih ngi ka Ri India kila pynlong ia ka jingthang mombati na ka bynta ka jingsuk ha ka jylla Manipur kaba don hapdeng ka jingiaum snam.
Ha nongbah Shillong ka seng samla pule ka KSU kaba dei ka bynta jong ka NESO ka la pynlong ia ka jingthang mombati ha Khyndailad na ka bynta ban duwai na ka bynta ka jingsuk hapoh ka jylla Manipur kaba don hapdeng ka jingiaumsnam kalaba la palat mynta shi bnai tam. Ha kane ka sngi da ki spah ngut ki paidbah kila wan ban ia shim bynta ha kane ka jingthang Mombati.
Ha kane ka sngi u President ka KSU u samla Lambokstarwell Marngar la ong ba kum ka seng kaba don lang ha ka NESO ka khmih lynti ba ka shong suk shong sain kan wan phai noh kloi hapoh ka jylla Manipur, kum ka seng kam kwah kren than hynrei ka jingsuk ka dei ban wan phai noh sha katei ka jylla.
U Cahriman ka NESO u bah Samuel B Jyrwa u la ong ba wat la ka jingiaumsnam hapoh jylla Manipur kala jan dap ar bnai hynrei ka jingialeh ka dang mih na kawei ka sngi sha kawei pat, kum ka kynhun ki samla pule kane ka thian kim lah ban shu peit ia kane ka jingiaumsnam.
Kum ka NESO kala pyrkhat kumno ban leh ban wanrah ia ka jingsuk ha katei ka jylla, ban wanrah ia ka jingsuk ka seng kala pynlong ia ka jingthang mombati ha baroh ki nongbah jong ki jylla ka thain shatei lam mih ngi ka Ri India ban phah ia ka khubor ba ka jylla Manipur ka don kam ia ka jingsuk.
Katei ka jingjia hapoh Manipur ka dei ka jingiaum snam para trai ri trai muluk bad lada kane ka jingjia kan jia kan long ka jingplie lad ia ki briew ba nabar ban kam trai hapoh ki jylla jong ngi, katei ka jingjia kala ktah ia bun ki samla pule kynthup ia kiba na kane ka jylla Meghalaya.
U Chairman ka NESO u la ong kaba sngewsih ka long ba u myntri rangbah duh jong ka Ri India haduh mynta um pat kren ei ei halor ka jingjia hapoh ka jylla Manipur, ki shipai kila don da ki phew hajar hynrei kim lah ban wanrah ia ka jingsuk, ka jingkylli ka long hota ba kam don kata ka mon ne don aiu sha lyndet.
La pynbna ba kum ki nongialam ka NESO kin leit sha Manipur ban ia kynduh ia ki nongialam jong ki arliang jaidbynriew kiba don ha ka jingiakynad ban pyrshang ban wanrah ia ka jingsngew thmu jingmut ban pynioh biang ia ka jingsuk, la ong u bah Samuel B Jyrwa Chairman ka NESO.
