Shillong, Lber 26: Ka Reserve Bank of India (RBI), Shillong Office, ka la pynlong ia ka Field Level Financial Literacy Event (FLFLE) ha ka 25 tarik Lber, 2026, ha ka shnong Mukhaialong, Wapung, ha East Jaintia Hills district, Meghalaya, kum shi bynta ki sienjam ba dang iaid shakhmat jong ka ban kyntiew ia ka jingsngewthuh ia ki kam pisa pilain bad ka jingpynsngewthuh hapdeng ki paidbah.
Ha ka jingai jingkren jong u, u Bah Olden Nongpluh u la pdiang sngewbha ïa baroh ki nongïashim bynta bad u la ban jur ruh ïa ka nongrim bad ka jingdonkam jong ka FLFLE. U la batai ruh ia ka jingdonkam ban ai bynta lang ia baroh ha ka kam pisa pilain, ka jingai jinghikai, ka pule puthi, ka jingnang jingstad, ka jingthmu, ka jingmang tyngka, ka jingkynshew pisa bad kiwei kiwei bad u la kyntu ia baroh ki nongiashim bynta ban shim kabu ia ka prokram bad ban pynleit jingmut ia ki jingkren jong ki nongkren bapher bapher khnang ba kin lah ban pyndonkam ia kaei kaba ki la ioh jinghikai na ka prokram.
U Bah F. Passah, Assistant Commissioner ka Sorkar Meghalaya u la batai sha ki nongïashim bynta ïa ka jingdonkam ban don ïa ki account ha ki bank, ban kyntiew ïa ka jingmlien ban kynshew pisa, ka jingshim ram na ki bank bad ban pynthikna ba ki bank account kin long kiba ryntih khnang ba ka jingpynpoi ïa ki jingmyntoi na ki skhim sorkar bapher bapher sha ki account jong ki kan long kaba jop.
U la pynsngew ruh sha ki nongïashim bynta ïa ka jingïathuhkhana lyngkot kaba ban jur ïa ka jingdonkam ban ïadei bad ki bank bad kyntu ïa baroh ban pynrung kyrteng ha ki skhim jingïada bapher bapher ha ka imlang sahlang khnang ba kin lah ban ïada ïalade bad ïa ki longïing na ki jingjia bym lah ban tip lypa.
Ka Kong D. Thiarta, na ka MSRLS, ka la ban jur ia ki san tylli ki nongrim treikam ba kongsan jong ki Self-Help Group na ka bynta ka jingjop bad ka jingai bynta lang ia baroh ha ka kam pisa tyngka hapoh ka DAY- NRLM: ki jingialang ba man ka por, ka jingkynshew pisa man ka por, ka jingai ram man ka por hapdeng jong ki, ka jingsiew biang ha ka por kaba biang bad ka jingbuh jingkhein kaba biang.
Ka la batai ruh ïa ki skhim bapher bapher ba la kyrshan da ka sorkar bad khamtam eh ia ka Atal Pension Yojana, da kaba ban jur ïa ki bynta ba kongsan jong ka skhim, ki jingdonkam ban ioh bynta, ka lad ban aiti ha kiwei, bad kiwei kiwei.
U Rangbah Shnong u la pdiang sngewbha ia ki heh sorkar bad ki nongiashim bynta bad u la pynpaw ka jingsngewnguh ia ka RBI kaba la pynlong ia kane ka prokram ha ka shnong jong u. U la pynshlur ruh ïa baroh ki kynthei kiba ïashim bynta ban wan ialam ïa ki lok jong ki sha kum kane ka prokram ha ki por ban wan khnang ba ki rangbah jong ki shnong ruh kin ïoh jingmyntoi na kum kane ka prokram bad ban pynshlur ba kin shim ram na ki bank ban kyrshan ïa ka kam lane ka kam rep jong ki bad kiwei kiwei.
U la ai jingiaroh ruh ia ka sienjam jong ka RBI ha kaba kyntiew ia ka jingsngewthuh ia ki kam pisa pilain ha Meghalaya bad u la kyntu ia ki nongtrei bank ban ai jingbatai ia ki nongshong shnong ha ki jaka nongkyndong shaphang ki jingmyntoi jong ka jingshim ram, kynthup ia ka KCC, ha kaba ka sorkar jylla ka la shim ia ki sienjam ban pynduna ia ka sut sha ki nongshim ram.
Ka Kong S.N. Lamare, DDM, NABARD, ka la kren shaphang ka bynta jong ka NABARD ha kaba ai jingkyrshan ha ka kam rep, ki jingdon jingem ha ki jaka nongkyndong, bad ki sienjam ban ai bynta lang ia baroh ha kam pisa pilain.
Ki ophisar na ka SLBC, LDM, State Bank of India bad MCAB Ltd ki la ai jinghikai ïa ki nongïashim bynta halor ki skhim bapher bapher ba iadei bad ki kam bank, kynthup ïa ka Sukanya Samriddhi Yojana, PMJDY, ki jingai ram ia ki SHG, bad ka KCC. Ki la ban jur ruh ia ka jingdonkam ban siew ia ka ram ha ka por kaba biang, ban bat ia ka jinglong ryntih ha kaba iadei bad ka jingshim ram, ka jingpynaisoh Aadhaar na ka bynta ka Direct Benefit Transfer (DBT), bad ka jingpyndonkam ia ki lad digital ha ki kam pisa ha rukom kaba don jingbahkhlieh.
Ki ophisar na ka RBI, Shillong, ki la ai ki jingkren sani ha kaba ïadei bad ka Financial Planning, ki skhim jingïada ha ka imlang sahlang, ka Re-KYC, bad ki rynsan digital kum ka UDGAM Portal, ka MANI App, bad ka UPI. Ki la ban jur ruh ïa ki lad jingïada pyrshah ïa ki kam beain lyngba ka bor internet bad ai jingtip ia ki nongïashim bynta shaphang ki lad pynbeit ïa ki jingeh, kynthup ïa ka Integrated Ombudsman Scheme, 2021.
Ha kane ka prokram la iadonlang u Bah Olden Nongpluh, GM(O-i-C), RBI Shillong Office; Bah F. Passah, Assistant Commissioner, Sorkar Meghalaya; Bah E. Blah, General Manager, Meghalaya Rural Bank; DDM NABARD, LDM, ki ophisar na ka SLBC, MSRLS, Meghalaya Rural Bank, MCAB Ltd, SBI, ki Rangbah Shnong bad ki nongiashim bynta na ki shnong ba marjan.
