Shillong, Rymphang 24: Ha ka 23 tarik u Rymphang 2026 janmiet, ka Khasi Students’ Union (KSU) Laban Circle ka la lap bad bat iaki 15 ngut ki briew ki bym dei ki trai jylla, kiba la sah be-aiñ khlem ki kot ki sla kiba biang bad khlem ka jingtip lane ka jingmynjur jong ka Dorbar Shnong.
Kine ki khar muslim ki wan shane ban ioh bylla bad ki sah ha kawei ka iingwai ha Laban. Katkum ka jinglum jingtip na ka liang ka Seng, ïa kane ka iingwai la ai sha ar ngut ki briew ki bym shim sah shuh shane ha ki bnai ba ladep bad kine pat ki ai pateng ha kine ki 15 ngut ban shong beaiñ khlem jingtip jong ki trai iing ne ioh jingbit na ka shnong.
Na ka liang ka Seng ka la kyndang mardor ïa kane ka iing bad pynmih lut ia baroh kine ki 15 ngut ba wan buhai shnong shane bad pynkit ïa kine da ka kali sha Assam na ka jylla kaba kila wan.
Ka Seng lyngba kane ka kyrwoh ka kwah ban pynkynmaw biang sa shisien ïa baroh ba katkum ka jingialang ba la shong da ka Seng bad baroh 7 tylli ki Dorbar Shnong ba kynthup hapoh ka Rait Laban Dorbar Pyllun bad Dorbar Shnong Lawsohtun ha ryngkat ka jingiadon lang ki pulit jong ka thanad Laban ha 5 tarik u Nailur, 2025, ka la shim ïa ka rai ba nym shah shuh ïa ki bar jylla ban ioh wai hapoh kine ki Dorbar Shnong khlem ioh jingbit bad jingpynskhem na ki Dorbar Shnong.
Ka Seng ka maham jur ba ki trai iing ki dei ban burom ïa kane ka rai bad kim bit ban leh pyrshah da kaba ai wai ïa ka iing ka jong ki sha ki bar jylla. Lada lap nangne sha khmat ki trai iing kin hap ban bah khlieh hi ïa kaei ka ban sa jia lada ki dang iai ai iing ïa ki bar jylla hapoh u pud u sam jong kine ki 8 tylli ki Dorbar Shnong.
