Tyrsad, Jylliew 02: Ka Mawlum Tyrsad Sports and Cultural Club ,Mylliem Syiemship hapoh ka jingialam u Bah Maitphang Khongsit President bad Bah Stam Nongbet Secretary ha ka 31tarik u Jymmang, 2019 ka la pynhap pyrda noh ia ka Inter Dong Football Tournament jong ka kaba la wan ban iashim bynta da ki 36tylli ki kynhun . U Bah S. K. Sun, MLA ka thain u la long u Kongsan bad u Bah Staising Kharbteng uwei na ki trai shnong ka thain kum u Symbud Kongsan ha ka jingdon ryngkat ki Rangbah Shnong, Secretary Shnong, President, Secretary ki Sport Club bad ki nongshong shnong ka thain. Ka Mawrohroh bad ka Wahumlawbah ki long ki kynhun ba iakhun ban ioh ia ka nam lahduh ha katei ka lympung ialehkai. Ha kaba kut jong ka jingialehkai ka Mawrohroh lyngba ki artylli ki goal ba la thep da u Khlainbor Khongsit bad u Kynsailang Khongsit ka la ioh ia ka nam lahduh da kaba pynliem ia ka Wahumlawbah kaba la ioh ban pynphai kawei ka goal lyngba u Keynold Marbaniang . Ka lahduh ka la ioh khur ia ka song Pisa kaba Hynriew phew hajar tyngka bad ka kynhun ba wan ba ar ka la ioh rah ia ka song Pisa kaba Laiphew hajar tyngka.
Kumjuh ka Pamsangut kaba la pylliem ia ka Lyngdoh Phanblang ha ka kyrdan ba lai lyngba ka tie breaker ka la ioh rah Khatsan hajar tyngka bad ka Lyngdoh Phanblang ka la ioh san hajar tyngka. Nalor ka song tyngka kitei ki kynhun ialehkai baroh ki la ioh ruh ia ki trophy.
U Bah Denial Umdor ,u Bah Kynsailang Khongsit bad Bah Khlainbor Khongsit na ka Mawrohroh ki la ioh ia ka nam kum Best Defender, Top Scorer bad Best player . U Bah Meban Shan Umdor bad u Bah Rubbarlang Nongbet na ka Pamsangut ki la ioh kum Promising player bad Best Goalkeeper.
U Bah S. K. Sun ha ka jingkren jong u, u la ai khublei ia ka klob kaba la shim khia ban pynlong ia katei ka lympung ialehkai ban kyntiew ia ki kam ialehkai ha ka thain bad kular ban iai don ryngkat bad ka klob na ka por sha ka por na bynta ban kyntiew ia ki kam ialehkai bad ka bha ka miat ki khun samla bad ki rangialehkai.
U Bah Staising Kharbteng u la pynpaw ba kumba ka mynsiem iatreilang bad jingkohnguh ia ki nongialam hapdeng ki rangialehkai ka don ha madan ialehkai ai ba kane ka jinglong kan ioh jaka ha ka imlang sahlang ruh kumjuh na bynta ka jingkiew shaphrang ha baroh ki liang da kaba bret shisyndon ia ka jingkwah burom bad jingwohkjat ia kiwei.
U Bah Roystar Rani Vice President uba pyniaid ia ka jingialang u la ai khublei kyrpang ia baroh ki kynhun kiba ia shim bynta ha katei ka lympung ialehkai, ki riew rangbah, ki paidbah, ia u symbud kongsan bad khamtam ia u Kongsan kiba la pynshngainlang. La ioh ruh ia ka jingkren na u Bah K.Nongbet Secretary Shnong Mawlum Tyrsad, u Bah D. Rani Principal Tyrsad Higher Secondary School bad kiwei kiwei.
La sam ia ki khusnam sha ki nongjop bapher bapher da u Kongsan, u symbud kongsan bad kiwei kiwei ki riew rangbah kiba la don ryngkat ha katei ka sngi.
