Shillong, Nailur 29: Kum shi bynta ban kyntiew ïa ka Sur Tynrai jong ka Jaitbynriew, ka Hynñiewtrep Youths’ Council (HYC) Sohïong Circle mynta ka sngi ka 28 tarik Nailur, 2019 kala pynlong ïa ka
Jingïakop Rwai Kynhun na ki skul ba pher ba pher kiba don ha ka thaiñ Nongkseh, Sohïong bad Weilyngkut. Ha kane ka sngi la wan ïa shim bynta shit rhem na ki skul ba pher ba pher kaba la pynlong ha Sohïong Indoor Sport Stadium.
Ha kane ka jing ïakop Rwai halor ka phang ” Kumno ban kyntiew ïa ka Imlang Sahlang” ïa ka nam lah duh la ïoh rah da ka Sohïong Higher Secondary School, ïa ka kyndan ba ar la ïohrah da ka Sohïong Presbyterian Secondary School bad ïa ka kyrdan ba lai la ïoh rah da ka Tlong-umïam Secondary School, Weilyngkut.
Haba kren ha kane ka sngi na ka liang jong u President, Samla Purningstar Shabong ula ong ba ka Jaitbynriew kaba kren beit da ka kyntien lajong ka dei ka Jaitbynriew kaba la shai, ka jaitbynriew kaba la shemphang bad ka jaitbynriew kaba don jingkyrmen ha ka pateng bad ruh u la ong ba ki samla ki dei ban sngewthuh ba ka jing long shai, jinglong stad bad ka jing long ba la kiew sha phrang kam dei eh kata ka jing nang ban kren phareng hynrei ka shong eh ha ki kam ba bha ba ki leh ban kyntiew sha phrang ha ki liang baroh.
Haba phai pat sha ka jing bun ki samla kiba la ngop noh ha ki jingdih pynbuiaid, ula pynpaw ïa jingbynñiaw ha kaba ka la pynjot pynpra bad pynsniew dur shi katdei eh ïa ka longing longsem, ka imlang sahlang bad ruh ïa ka Jaitbynriew. Ula kyrpad ruh ïa ki skul ba kin ïatrei lang bad ka Seng ban kyntiew bad pynbha ïa ka imlang sahlang ha kiba bun ki bynta namar ba ki skul ki don ka bor ba khraw kumno ban hikai bad kumno ban saiñ dur ïa ka imlang sahlang.
Ha kane ka sngi la ïoh ruh ka jingkren na u Samla Joplang Kharnaïor uba long u kongsan ha kane ka sngi bad uba long ruh u Assistant Education Secretary jong ka HYC Central Body. Na ka liang jong u Samla Joplang Kharnaïor ula ong ba kum ki samla ki dei ban long kiba skhem, kiba ïaineh ha ki kam jong ki bad ula ong ruh ka bor ban saiñdur ïa ka imlang sahlang ka shong eh ha ki khun samla namar ka jaitbynriew ka donkam kyrkih ban sei shibun ki riew donsap, ki riew len lade bad kiba lah ban ïeng hala ki jong ki kjat khnang ban im ka Jaitbynriew.
