Shill
ong, Nailar 14: Ka Executive Committee kaba la shong pyrkhat kam mynta ka sngi kala shim ia ka rai ban shim biang ia ka Khasi Hills Autonomous District (Khasi Social Custom of Lineage)(Second Amendment) Bill, 2018 na ka sorkar na ka bynta ban pynbha.
Haba kren ha ki nongthoh khubor u CEM jong ka KHADC u Bah HS Shylla u la ong ba la shim ia kane ka rai ban thoh sha ka sorkar jylla ban shim biang ia kane ka bill ka long ba ka ia kynthuh ha ka Khasi Hills Autonomous District (Khasi Social Custom of Lineage) Act 2005 bad kane kaba ki wanrah ia ka jingkylla ha ka amendment bill 2018.
Hapoh jong ka Act kyndon kaba shiphew ka kren ba lada ka kynthei khasi ka ioh da u bymdei khasi, la da ka shim jiat dha ka kmie ki khun ki dei ki khasi. Katba ha kane ka jingpynkylla ka kren shai ba ka kynthei khasi kaba ioh lok ia u bym dei khasi kin nym dei shuh ki khasi kine ki ia tyngkhuh dei halor kane ka nongrim ba ka EC kala rai ban shim biang ia ka Bill kaba la dep ban pass da ka iing dorbar.
Kane ka jingshim noh ia ka Bill kaba la pass ka long ban weng noh ia ka kyndon kaba shiphew hapoh jong ka Act bad ha ka jaka jong ka yn pynrung noh da kane kaba thymmai. Kane ka jingpynkylla kaba la wanrah ka long ban khang syndon ia ka jinglong khasi kito kiba ioh lok da ki bym dei khasi. U Bah Shylla u la kren shai ba la leh ia kane hapoh ka khyrngit kaba 29 jong ka Riti synshar jong ka Ri India katkum ka kyndon (I).
Haba jubab ia ki jingkylli haba ia dei bad ki shynrang kiba ioh lok da u bym dei khasi, u Bah Shylla u la ong ba ka EC kala ioh bun ki jingkren ha kaba ia dei bad kane ka EC kan dang peit shuwa ia kane namar kane kam dei ka jingma, namar u shynrang lada u ioh briew da kawei pat u hap ban tang jait, ym kum ka kynthei kaba shim ia ka jait.
Haba ia dei bad ki kur ka EC mynta ka sngi kala shim ia ka rai ban pynmih ia ka “Executive Order” namar ha ka jingpynkylla ia ka ka Khasi Hills Autonomous District (Khasi Social Custom of Lineage)( First Amendment) Bill, 2015, kala shuthoh rangbah kur hynrei kam shym la batai shai ia ka kam jong u rangbah kur. Ia kane ka Bill ruh ka EC kala shim ia ka rai ban shim noh na ka sorkar.
Kawei pat ka rai ha kaba ia dei bad ki khlieh nongsynshar ka EC mynta ka sngi kala shim ia ka rai ban thaw ia ka “Council of Traditional Chief and Headman, katkum ka Sixth Schedule kaba la kren shai ia kane. Kane ka kynhun kan long ka nongaijingmut sha ka District Council ha kaba ia dei bad ki Riti Dustur bad la mang kawei ka kamra na ka bynta jong ki hapoh jong ka KHADC na ka bynta jong ki.
