Shillong, Nohprah 13: Ka Executive Committee jong u bah Pyniaid Sing Syiem hapoh jong ka KHADC ha ka jingialang kaba la long mynta ka sngi kala shim ia ka rai ban wanrah ia ki katto katne tylli ki Bill ha ka dorbar blang ban long lai sngi lynter kata 20 haduh 22 tarik mynta u bnai.
La iathuh ba ha kane ka jingiakren hapoh ka EC mynta ka sngi ka long ha kaba ia dei bad ka Adminstration of Clan Bills ha kaba kila ia kren bniah bha ha kane ka jingialang kaba la long mynta ka sngi, namar dang shen ha ka dorbar ba kyrpang kaba la long ha u bnai Risaw la ioh ban wanrah ia kane ka bill.
Hynrei namar kala don ka jingiatai kaba bniah hapoh ka iing dorbar hynrei namar ka iing dorbar kala rai ban aiti sha ka Executive Committee ban dang peit bniah bha ia kane Clan Bill, hynrei mynta ka sngi la shim ia ka rai ban pdiang hapoh ka iing dorbar ha kane ka dorbar tlang ban wan.
Ka jingthmu jong kane ka Clan Bills ka long ban teh song ban pyniatylli ia ki kur bapher bapher bad ban pynbeit ia ka jingtrei kam, kum ka nuksa haba ia dei bad ka tang jait, lada u shynrang khasi u ioh lok da ka bymdei khasi ia ki khun hap ban tang jait, kane ka long kaba don kam bha bad ka jingiadei bad ka kur.
Kawei pat ka bill kaba kin wan rah ka long halor ka Khasi-Jaintia Fishery Amendment Bills 2023, kumba ia tip la don ia kane ka ain kaba dei na duh u snem 1954, naduh katei ka ain, ka jingthmu ka long ban ai bor ia ki shnong ban pynneh pynsah ia ki Um ki wah kiba dei ki tyllong um khamtam ia ki doh um dohpnah.
Kane ka ain kala khang pyrshah ia ki briew ba pynjot ia ki dohum dohwah bad kane ka ain kaba kin sa wanrah ia jingpynkylla kalong ban dang kham pynjanai shuh shuh ia kaba la don lypa ban ia treilang bad ki it ki hima ha ki lum khasi jong ki bad kane ka don ka jingiajan bad ka jingpynneh pynsah ia ka mariang.
Ha kane ka jingalang kila iakren ruh ia ka Tamasa Mawbyna ha dien ba la wan jngoh ar sien, hynrei na ka daw bym lah ban kiar bad ia ka tarik kaba la long ka Secretariat la shim ia ka rai ba ia kane ka Tamasa kan long noh ha ka 01 haduh 3 tarik ha u bnai Rymphang 2024 ha Mawphlang.
Ka EC kala shim ruh ia rai ha kaba ia dei bad ki nongtrei ha KHADC kiba don kumba 800 ngut, kane ka rai ka long ba ka EC kan pynlut katto katne ka jingiarap kum ka bai dawai na ka bynta ki nongtrei haba ki pang ki shitom namar kam don haduh mynta, namar kam don kane ka jingiarap kala buh ia ki ha ka jigneh.
Ban iarap ia ki ka KHADC kala ia kren bad ka SBI ba kum ka kynhun kin buh iak a Medical Insurance bad ia ka pisa ban siew yn siew sa a KHADC bad ia kane ka jingmang pisa kan long katkum ka rta, ka jingiarap kan long naduh T.3 lak haduh T. 7.5 lak tyngka ha ka shisnem, kata ka shong ha ka rta kaba ki don bad la bthah ia ka SBI ka ban pyniasoh bad ki Hospital bad ki Hospital sha bar ruh kum ka CMC Velor.
