Shillong, Nailur 25: Ka kabinet mynta ka sngi kala pdiang ia ki sngi shuti na ka bynta u snem 2025 kaba la wan na ka tnad sorkar ka GAD bad kam shym don kano kano ka jingkylla ka neh kum juh kumba ka long.
Ha dien ba la shong thiat u wei na ki dkhot kiba dei ha ka Meghalaya Human Right Commission ka committee ban want ia ki dkhot kaba la khlieh da u myntri rangbah ka jylla kala tyrwa ia ka kyrteng jong u bah H Nongpluh u IPS ophisar ba la shong thait ban long u dkhot.
Ha kane ka Kabinet la pdieng ruh ia ka kyrteng ban long dkhot jong ka Zila Sainik Shillong ka committee kaba khlieh da u Chief Secretary kala wan rah iaki kyrteng bad la jied ia u Lt Colonel Sabastian Marbaniang bad ka kabinet kala pdiang.
Mynta ka sngi ka jingialang jong ka kabinet kala iakren ruh ban pynkylla katto katne tylli ki rule jong ka Excise Department, ka rule kaba kila wanrah ia ka jingkylla ka long ban ai noh tang kawei ka Laisen “Composite License” la leh ia kane ka daw jong ki Hotel khamtam ki Five Star Hotel kiba don ha ka jylla bad ki ban dang wan.
Mynshuwa haba ai Laisen ka long halor ka nongrim jong ka Restaurant ne ka Bar, haka lada ka Hotel ka don saw tylli ki Restaurant ne ki Bar ki hap ban shims aw tylli ki Laisen na ka bynta kawei kawei bad kane ka long ban ai noh tang kawei ka Laisen na ka bynta baroh ki Bar bad Restaurant, ka dor jong ka laisen kan khamrem.
Ka Kabinet kala rai ruh ban buh noh da QR Code ia ki jaid kyiad kiba bun jaid ban tip ia ka jingdie ia ka kyiad, kane ka long ba man u bilor kyiad un don ia u number kane ka long ban lap shano ka kyiad la dei bad ban lap ia ka jinglaittuh ia ka khajnan, kane kan iarap ban khanglad.
Ha kane ka sngi la ioh ruh ia ka jingpyni bakumno ban pynheh ia ka kad lieng suin bad la dep ban jurip ia ka jaka kaba 22 KM sawdong ka jaka ba kane ka kad lieng suin kan hiar ki liengsuin Airbus-320 bad Boeing-737 ki lah ban hiar ha Shillong Airport.
