Shillong, Kyllalyngkot 19: Ka Kynhun Pulit jong ka Sorkar Pdeng, Central Reserve Police Force kaba don ha kane ka Nongbah Shillong kaba dei na ka 67 Batallion mynta ka sngi 19 tarik Kyllalyngkot 2026 kala sdang ia ka jing pynsngewthuh paidbah haba iadei bad ka jingrakhie ia ka jingdap 150 snem jong ka jingrwai Vande Mataram.
Ia ka jingrakhie ia kane ka jingdap 150 snem kane ka jingrwai Vande Mataram ba la thoh da u Bankim Chandra Chatterjee ha u snem 1875, kane ka kynhun pulit CRPF kaba 67 kan rakhie burom saw sngi lynter ia kaba la sdang mynta ka sngi ban rwai ia kane ka jingrwai ha khmat ki paidbah da ka kynhun nongtem jong ki kynthei ha khyndailad.
Kane kajuh ka kynhun nongrwai, kin pynlong sa ha kiwei kiwei ki bynta jong kane ka Nongbah Shillong ban rwai ha ki rukom rwai bapher bapher jong kane ka jingrwai Vande Mataram. Ha kane ka sngi ki paidbah kiba iaid ba ieng ki la ia ieng ban sngap ia ka jingrwai ieid la ka Ri kaba la rwai ha ka por jong ka jingialehlaitluid na ka jingsynshar ki nongwei.
U wei na ki heh Pulit jong ka kynhun CRPF u bym shym la pynpaw kyrteng u la ong ba la pyntikna ba kane ka jingrakhie burom ia ka jingdap 150 snem ka jingrwai Vande Mataram yn rakhie saw sngi lynter ha kane ka Nongbah Shillong bad ia kum kine ki jingrwai yn pynlong ha ki jaka bapher bapher kane ka Nongbah ka Jylla Meghalaya.
