Shillong, Lber 05: Mynta ka sngi ka NEIGRIHMS kala rakhe ia ka lyngkhuh snem ba kala kynjoh sha ka 16 snem naduh bala sdang ia ki jingai jingsumar bad kane ka dei ka sngi jong ka jingkmen bad ka burom la ong u Prof. Animesh Mishra ba peit ia ka jaka pule bad u la pynsmai ia kiba pass MBBS.
U Prof Nalin Metha Director ka NEIGRIHMS ha ka jingkren ka jong u la ong ba ia ki doctor kiba pass na ka Ri India ki ioh ia ka burom ha kylleng ka pyrthei bad u la ong ba ia ki jinghikai kaba kila ioh dei ban pyndon kam haba ki sumar ia kiba pang ba shitom.
U Director u la ai khublei ia ki samla kiba la pyndep ia ka jingpule bad u pynpaw ia ka jingngeit skhem ha ki ba kin pyndon kam ia ka jingstad kaba kila ioh ban ai ka jingshakri ia ka ri ha ka koit ka khiah.
Ha kane ka sngi u Prof (Dr). Vedprakash Mishra, Pro-Chancellor jong ka Datta Meghe Institute of Higher Education & Research (DMIHER), Wardha, Maharashtra u la long u kongsan u la kren ha kaba ia dei bad ki lad jingsumar ha kane ka Ri India kaba la wan rah ka jingkylla ha kine ki 20 snem.
U Prof.Vedprakash ha ka jingkren ka jong u, u ban jur ka phang kaba kongsan eh ka long ba kin long kiba lah ban trei ia ka kam da ka jingshaniah ha lade, ka jingkit kitkhlieh bad da kaba bat ia ka jignsumar kumba long ha ka ri baroh kawei bad u la ai ka jingkitbok ia baroh kiba la pyndep ia ka jingpule ka jong ki.
