Shillong, Jymmang 26: Ka skulbah North-Eastern Hill University (NEHU), kawei na ki skulbah bapaw nam ha kathain shatei lam mihngi jong ka Ri India, ka la rakhe lynghuh jingdap 52 snem ha ka 26/Jymmang/ 2025 ha kaba u MP Rajya Sabha u Dr. W. R. Kharlukhi u la long u kongsan ha kane ka sngi.
Ha ka jingkren u kongsan u Dr. W. R. Kharlukhi u la ai khublei ïa u Prof. Lamare bad ka kynhun jong u halor ka jingpynlait paidbah ïaka jingrwai bad u la pynleit jingmut halor ka jingïaidlynti jong ka NEHU lyngba ki jingeh. “Ki jingehki long ki jingkyrkhu,” u la kynthoh, da kaba pynskhem baka jingkhraw bunsien kamih naki jingtynjuh.
U la pynkynmaw ia la ki jong ki sngi samla pule ha NEHU bad u la pynksan kumno ka skul bah ka pynwan dur ym tang iaki kam hynrei iaka jinglong jong ki samla pule jong ka. Da kaba ai nuksa kum ka Prof. Sungoh bad ma u hi, u la ong da ka jingsngew sarong, “Ngi baroh ngi dei ki jingmih naka NEHU.”
Ha kane ka sngi la pyllait paidbah ia ka jingrwai jong ka NEHU kaba la aikyrteng “Rise Up and Build” da u Kongsan. La thaw da u Dr. Uttam Sharma, ryngkat bad ki kyntien ba la thoh da u Prof. Shobhan N Lamare.
Ha ka jingkren u Prof. Lamare u la batai bniah shaphang ka jingpynshlur kaba don ha lyndet jong ka jingrwai, da kaba pynksan ïa ka jingmut jong ka jingong jongk a University “Rise Up and Build” bad ka dak jong ka sngi kaba mih kaba pyni ïa ka jingshai, ka jingshisha bad ka bor.
U la kdew kumno ka jingrwai ka shim naka jingitynnad jong ka mariang bad ki khanatang jong ka ri, kiwah, bad kiwahduid, ha kaba kut ka thmu ban pynshlur ia ki samla ban shim ia ka jingkitkhlieh bad shakri ia ka jaitbynriew.
Kiba la don lang ha kane ka sngi ki long ka Prof. S. M. Sungoh, Vice-Chancellor ba dei peit shipor, ki nongialam na ki kynhun bapher bapher kiba don ha katei ka skul bah, ki nonghikai bad ki bym dei ruh ki nonghikai hynrei kiba trei ha kane ka skulbah kila ia don lang ban sakhi ia kane ka lyngkhuh ka jingdap 52 snem ka NEHU.
