Shillong, Naitung 21: U Secretary jong ka shnong Mutapur u Bah B Buam u la iathuh ba ha ka sngi Saitjain ki shipai jong ka Bangladesh Border Guard (BGB) jong ka Ri Bangladesh kila wanrung hapoh shnong bad kila pynsangeh ia ka jingtrei ia ka surok shnong.
Haba kren ha u SP News Agency, u Bah Buam Secretary jong ka shnong Mutapur kaba hap hapoh jong ka West Jaintia Hills District, u la iathuh ba ha ka sngi Saitjain por shiteng sngi ki shipai jong ka BGB kila wan rung sha shnong bad kila khang ia ki briew kiba dang ia trei ia ka surok shnong ban leit sha brikwai.
U Bah Buam u la iathuh ba kine ki BGB kila rung palat ia ka 150 kam sha India na u mawthum bad ia kane ki juh leh man ka por, hynrei dei tang mynmin ka sngi ba kila wan ban khang ia ka jingtrei kaba la pyntrei da ka shnong. Ha kane ka jingwan khang ki shipai BGB kila ong ba kane ka surok ka dang hap hapoh ka 150 kam.
Na ka liang jong ki bor shnong kila pyntip sha ki shipai BSF kiba don ha Dawki ba kin ia kren lem ia kane ka jingleh jong ki BGB bad ban ujor ia kane ka jingwan rung jong ki shipai jong ka Bangladesh sha poh shnong hynrei na ka liang jong ki BSF kiba dei jong ka Ri India kim shym la wan sha katei ka jaka.
Ka shnong Muktapur ka dei ka shnong kaba don ha khappud bad ka Bangladesh kaba hap hapoh jong ka BOP jong ka Dawki jong ka West Jiantia Hills District. Na ka liang jong ka shnong ka pynpaw ia ka jingsngew syier ia ka jingwan tuklar jong ki Shipai BGB bad na ka liang jong ki BSF kim don ha katei ka por ba ki BGB ki rung sha poh ka shnong, la ong u Secretary u Bah Buam.
