Shillong, Nailur 26: Na ka liang jong ka seng HYC baroh kawei, mynta ka sngi kaba dei ka sngi lyngkhuh sngi iap kaba hynniew jong u bah Hopingstone Lyngdoh, u wei na ki riewrangbah ba juh kren na ka por sha ka por ba dei bad kane ka kam khappud bad la ialeh ruh ba kumno ki jaka jong ki hima Khasi kin nym duh ei ba kin nym leit sha Assam.
U Bah Roy Kupar Synrem, General Secretary ka seng la ong ba ha kum kane ka sngi ban kynmaw burom ia u Ma ieid Hoping ba kum ka seng ka dap da ka jingsngewsih ia ka jingduh noh ia une u riew rangbah kum ka jaidbynriew bad kila sngewdei ban pynmih ia kane ka kot lyngkdop ban pynshai paidbah halor ki jingsngew bad ki jingshisha kiba kum ka seng ban pynpaw ba kum ka jaidbynriew la duh nongshibun eh ha kane ka jingiapynbeit pud bad ka Assam.
Ha kane ka jingiasoi ia ka soskular pynbeit pud bad ka jylla Assam, ka seng HYC naduh ba sdang kala ong ba ka long kaba bakla ban ia pynbeit ia u pud u sam ha kane ka kylla step kaba nyngkong, kumba ka long ki jaka jong ki hima khasi la duh ei sha ka jylla Assam.
Kumba la iatip ba ka nongrim ka sorkar ka ieng ka long katkum ka kaiphot jong u snem 2011, ia kaba la ai sha ka Assam ha kato ka por bad kane ka sorkar kaba mynta ka ong ba kam lah shuh ban phai din, lada ka long kumta ki sngewthuh ba kum ka seng lada iaid ha kata ka lynti ka jingma bad ka jingeh ha kane ka kylla kaba ar ha ka jingiakren pud.
Ha kane ka jylla kaba ar kan don ka jingiapynbeit ha ki jaka kiba kham eh haba ia dei kum ka Langpih, Block I bad Block II, ka Pysiar, Khanduli, Desdomria bad ka Nongwah Mawtamur, kum ka seng ka pynpaw sha ki paidbah, ki paradoh parasnam ki nongshong shnong ka Bri Hynniewtrep ba kane ka sorkar ha ei ka bakla.
Ka jignbakla kaba nyngkong jong kane ka sorkar ka dei ba kamsngewthuh ia pud u sam jong ka jylla Meghalaya, dei ban sngewthuh ba ka District Council ka ioh ia u pud u sam dei lyngba ki hima Khasi, ka sorkar Meghalaya ka ioh iau pud u sam ka dei na ki District Council haba kumta ban ioh ban tip thikna ia u pud u sam ka jylla ban don ka jingiasgewthuy jingmut khamtam eh bad ki hima Khasi.
Kumba ka long mynta 12 lane 13 tylli ki shnong jong ka Hima Nonglang kila leit noh sha Assam, ki shnong kiba hap hapoh ka Hima Jyrngam kila iaid noh sha Assam, ki shnong kiba hap Hima Jinrang bad Nongspung kila leit noh sha Assam, lada peit ia ka shnong Jimrigaon bad ka Lyngkhung ki dei ki ar tylli kiba hap hapoh ka hima Nongpsung bad Hima Jirang.
Kine ki shnong kiba la long trai da ki hima khasi ia ki kot jaka kiba la ai da ki hima khasi, kaba sngewsih ka long ba ha ka por ba u myntri rangbah ka jylla u ia soi ia ka soskular u khlem kynjoh ktien ia ki hima khasi dei halor kane ka nogrim kaba la pynlong ia ki hima Khasi ban leit tid ia ka jingkhang jong kaba ha khlieduh jong ka Ri India ka Supreme Court.
Ka jingong ka sorkar jylla ba ki briew kiba shnong ha kine ki jaka kin rai la kin leit sha Meghalaya ne sha Assam ka long kaba ym lah ban pdiang namar ki tip, lada ki briew kiba shong hangto kin rai kum ba ong ka sorkar kane kan buh ia ka jingma namar kine ki briew kila dep ban pynpaw ba kin leit sha Assam.
Haba ia dei bad ka Block I, Block II ha ka kaiphot jong u snem 2011 ki don tangkatto katne tylli hynrei mynta pat ki don kumba 50 tylli ei ei kiba kwah ban wan sha Meghalaya , lada u Cornad u la ong ba kin bat ia ka kaiphot 2011 kan jia aiu ia ki Khasi Pnar kiba kwah ban wan sha Meghalaya la kylli u General Secretary ka seng HYC.
Ka seng HYC ka pan ia ka jingkyrshan jong kipaidbah ban ialeh pyrshah ia kane ka jingiasoi beain ka sorkar u Conrad ban ia pynbeit pud, kane ka jingsam ia ki kot mynta ka sngi ki la sdang ban sam ia kine ki kot ha IGP, sha DC Ophis Shillogn, ha Khyndailad bad sha Motphra bad kin sa sam kylleng ka sor Shillong.Haba ia dei bad kiwei ki District kin sa sam ha West Khasi Hills Ri Bhoi District bad kylleng ka Bri u Hynniewtrep.
