Shillong, Nohprah 14: Ka Jylla Meghalaya ka la sdang ïa ka Skhim Green Deposit ban tehlakam ïa ka jingpynjaboh da ki plastic ha ki jaka jngohkai pyrthei kiba bun ki briew, kaba pynskhem ïa ka jingialeh jong ka Jylla na ka bynta ka kam jngohkai pyrthei kaba neh bad ka jingiada na ki jaboh jabaiñ kaba kham khlaiñ.
Ia kane ka sienjam la sdang ha Cherrapunjee, Dawki bad ki Living Root Bridge, ki jaka kiba la sakhi ka jingkiew bha ha ka kam jngohkai pyrthei bad ka jingbret pathar ia ki plastic kiba ktah ia ki khlaw ki btap, ki wah bad ki jingdon jingem jong ka mariang kiba lah ban don ha ka jingma.
Hapoh kane ka sienjam, ki nongjngohkai pyrthei kiba rah ïa ki tiar plastic kum ki bilor ne ki jingsong jingbam sha ki jaka ba la ithuh ki dei ban siew ïa ka pisa kaba lah ban ioh biang kaba long T.100, kaba la pynphai biang ynda la bret ne pynphai biang ïa ki jaboh plastic ha ki jaka ba la buh kyrpang shuwa ban mih na kine ki jaka jngoh kai.
Kane ka sienjam ka thmu ban tehlakam ïa ka jingbret jaboh bad ban kyntiew ïa ka kolshor “bym ieh ia kano kano ka dak” hapdeng ki nongwan jngohkai. Ka Skhim Green Deposit ka dei ka bynta jong ki jingpynkylla ba kham jylliew jong ka Meghalaya ha ka rukom iada na ki jaboh, kiba kynthup ia ki rukom pynkhuid ba la ialam da ki shnong ki thaw, ka jingkyntiew ia ka jingpyniakhlad ia ki jaboh, bad ka jingpyntreikam kaba kham pyrkhing ia ki kyndon ba iadei bad ki plastic.
Ka iahap ruh bad ki jingbthah jong ka Meghalaya High Court halor ka jingpyntreikam pyrkhing ia ki jingkhang ia ki plastic ba pyndonkam tang shisien pyndonkam, khamtam ia ki tiar kiba hapoh 120 micron.
Ki heh sorkar ki la ong ba kane ka sienjam ka pyniasoh lang ia ka jingpyntreikam bad ka jingai jinghikai, ha kaba ki nongshong shnong bad kito kiba don bynta ha ka kam jngohkai pyrthei ki don ka bynta kaba kongsan ha kaba pyntreikam, ban pynthikna ia ka jingiada ia ka mariang katba ki kyrshan ia ka jingkiew ka kam jngohkai pyrthei kaba don jingkitkhlieh.
Ka Skhim Green Deposit ka iarap ruh ïa ki sienjam Clean Hills City hapoh ka Swachh Bharat Mission – Urban (SBM-U) 2.0, ba la kyrshan da ka Tnad Housing and Urban Affairs, Sorkar India, ryngkat ka jingïatreilang bad ki sorkar jylla.
Ha kylleng ki nongbah ha ki jaka rilum bad ki shnong ha kylleng ka ri, kine ki sienjam ki pynleit jingmut ha ka jingpynbeit ia ki jingeh kiba iadei bad ki jaboh jabaiñ da kaba pyndonkam da ka jingstad science, ka jingpynduna ia ki jaboh jplastic, ka jingpyniakhlad naduh tyllong bad ki jingialap ban pynkylla ia ka jinglong ba la shna kyrpang na ka bynta ki jaka ba don ha ka jingma.
