Shillong, Rymphang 10: Da kaba pyni ia ka mynsiem jong ki samla, ka mynsiem jong ka kam ialehkai bad ka jingiatylli ha ka ri, la sdang ia ka Unity Utsav 2.0 mynta ka sngi ha Delhi Cantonment ryngkat ka jingiashim bynta shitrhem.
La pynlong hapoh ka jingkyrshan jong ka Assam Rifles, kane ka lympung ïalehkai kadei ka bynta kaba ar jong kane ka sienjam ba kyrpang ba iadei bad ka kam ïalehkai, kaba tei halor ka jingjop jong ka snem ba nyngkong jong ka bad kaba buh ïa ka sur kaba ai mynsiem naduh ka sngi kaba nyngkong eh.
Ka Unity Utsav 2.0 ka ai ka rynsan kaba khlain bad kaba pynkup bor ïa ki samla na ka thaiñ Shatei Lammihngi ban pyni ïa ka sap ïalehkai jong ki, ka mynsiem ïakhun bad ka jingïatreilang ha ki jait jingïalehkai bapher bapher.
Palat 1,000 ngut ki samla pule na phra tylli ki jylla ka thaiñ shatei lammihngi, kiba dang pule mynta ha Delhi, ki la ïashim bynta ha kane ka jingrakhe ba heh bha jong ki jingïalehkai bapher bapher.
Ha kane ka lympung ïalehkai la pynlong ïa ki jingïalehkai Football, Volleyball, Table Tennis, Badminton bad Basketball, ha kaba la pynlong ïa ki jingïalehkai na ka bynta ki shynrang bad kynthei, kaba pyni ïa ka jinglong ba kynthup lang ia baroh bad kaba ïaid shaphrang jong ka Utsav.
Kane ka lympung ialehkai ym tangba ka kyntiew ïa ka jingkoit jingkhiah bad ka mynsiem jong ka kam ïalehkai hynrei ka pynshlur ruh ïa ka jingïakhun kaba koit ba khiah bad ka jingïaburom markylliang hapdeng ki nongïashim bynta.
Nalor ki jingialehkai, ka Unity Utsav 2.0 ka ieng kum ka dak jong ka jingiatylli, ka jingpyniasoh ha ka kolshor bad ka jingiatylli ha ka ri. Da kaba pynïasoh lang ïa ki samla pule na ki jylla bapher bapher hapoh kawei ka rynsan.
Kane ka lympung ialehkai ka pynskhem ïa ka jingïadei paralok hapdeng ki jylla bad ka kyntiew ïa ka jingsngew ba ïadon bynta lang. Ka rakhe ia ka jingriewspah jong ka jingiar jong ka thain shatei lammihngi katba ka pynskhem ia ka mynsiem jong ka jingiatylli kaba pyniasoh lang ia ka ri.
