Shillong, Naitung 02: Ka kynhun tohkit bala thung da ka Tnad Housing kala sdang ia ka jingtohkit halor ka jingkynnoh sam tin sop iing ba tad-dor da ka Tnad Housing sha ki paidbah, kaba la sam lyngba ki Community bad Rural Developmemt Block (C&RD) ka Jylla.
Ia kane ka kynhun tohkit la khlieh da u Joint Secretary ka Tnad Housing u LC Marak mynta ka sngi ka 2 tarik u Naitung 2024 kiban hiar tohkit ha baroh ki 7 tylli ki District ka Ri-lum Khasi bad Jaintia.
Ia kane ka jingtohkit kala mih halor ka jingujor jong ka seng Hynniewtrep Youth Council (HYC) pyrshah ia ka jingkynnoh sam tin sopiing ba tad dor, kaba la thied lyngba ka Chief Minister Housing Assistance Programme (CMHAP). Haba hiar ban tohkit ia ki tin sop iing hapoh ka kudam jong ka Tnad Housing kaba don ha Lumphira, Langkyrding, ha ka jingiadonlang ki Nongialam ka HYC.
La sakhi ba ki dkhot ka kynhun tohkit kila thew thik pa thik ia ka jingrben jong ka tin, ka jingjrong ka pyngkiang bad ka lynter jong ka tin, ban pynthikna la kine ki tin bala pynpoi sha Jylla, ki dei ne ki kiba iaid kat kum ki kyndon bala buh da ka tnad.
Ha ba ioh ban ia kren bad ki nongthoh khubor na ka liang u president ka HYC u bah Roy Kupar Synrem ula ong ba ha ka jingthew ia ki tin ha kane ka kudam ha Lumphira, la lap ba ka jingrben jong ka tin ka long tang hapdeng 40-41 mm, kaba dun ia ka 45mm bala buh da ka Tnad Housin u la ong ba wat ka jingkhia jongka tin ruh ka duna bha.
U bah Synrem u la ong ruh ba ngin sa iahiar lang bad ka kynhun tohkit sha kine ki jaka ban iapeit bad iathew iawoh ia kine ki tin. Hadien kane ka kam, ngin sa pynkhreh ia ki jingai jingmut ban sa phah sha ka Sorkar Jylla ia kaei kaba ka dei ban leh.
U la pyntip ruh ba ka kynhun tohkit kan pynlong ia ka jingtohkit ha ki C&RD Block ka East Khasi Hills haduh ka 9 tarik Naitung, bad hadien kane kan sa hiar sa sha West Jaintia Hills ha ka 12 tarik Naitung, Ri-Bhoi ha ka 13 tarik Naitung, Eastern West Khasi Hills bad West Khasi Hills ha ka 16 tarik Naitung, East Jaintia Hills ha ka 19 tarik Naitung bad South West Khasi Hills ha ka 20 tarik Naitung.
