Shillong, Nailar 18: U Bah Michael Warjri Secretary jong ka Hima Nongspung u la ong ba u la shah byrgnem ha u Tap
on Kalita u ba dei na ka shnong Mirza jong ka jylla Assam na ka daw ba u la pyrshah ban shna ia ki ar tylli ki surok na Assam sha Meghalaya kiba hap hapoh jong ka Hima Nongspung ha Ri Bhoi District.
Haba kren ha ki nongthoh khubor mynta ka sngi ha Shillong Press Club u Bah Warjri u la iathuh ba na ka liang jong u u la ai ka jingujor sha u myntri rangbah ka jylla, ka Deputy Commissioner jong ka Ri Bhoi District bad kum juh sha u MLA jong ka Jirang u bah S Sohtun ia kane ka jingwan shna surok jong ka sorkar Assam.
U Bah Warjri u la iathuh ba kine ki ar tylli ki surok, kawei ha Patagoan kaba shong dor T.14 klur bad kawei ha Mawding kaba shongdorbar T.13 klur baroh ar tylli kine ki surok ki dei ban iaid na Assam sha Meghalaya. Na ka liang jong u MLA u thoh ia ka shithi sha ka sorkar Meghalaya ha ka 16/10/2017 ban pan jingbit hynrei na ka liang jong ka sorkar Meghalaya haduh mynta kam pat ai jingbit.
Hynrei na ka liang jong u tei u Tapon Kalita u ba dei u kontraktor ia kine ki ar tylli ki surok u la trei da ka bor bad, khlem da sgnap ia ka hukum jong ka DC jong ka Ri Bhoi kaba la ai ha ka 19/3/2018 kaba la bethah ban sangeh noh ia ka jingtrei. Dei halor kane ka jingkhang u Kalita u la rah bor ia u Atos Momin nongshong shnong ka Balakhawa bad pynshitom ia u haduh ba un da mynsaw jur.
Haba ia dei bad kane ka jingjia u la ai ia ka ejahar ha Palasbari Police Station jong ka District Kamrup jong ka jylla Assam, ha dien kane u tei u Kalita u la byrngem ban rah bor sa ia u kum u Secretary jong ka Hima Nongspung, haba ia dei bad kane ka jingshah byrgnem u la pyntip sha u Commissioner Secretary jong ka tnad kam poh iing ka sorkar Meghalaya.
Haba pdeng kine ki jingjia baroh u Bah Warjri u la ong ba ka sorkar Meghalaya haduh mynta ka dang sngap jar jar, katba na ka liang jong ka jylla Assam kala dang beteng ia kane ka jingshna surok bad kane kala pynlong ia u ban mudui da ka mukotduna hapoh jong ka High Court jong ka jylla Meghalaya.
La iathuh ba dang ha ka 13 tarik mynta u bnai na ka liang jong ka jylla Assam kala wan ban shna ia ka jingkieng iaid kali ha Ranibari da kaba pynjot ia ka surok kaba la shna da ka sorkar Meghalaya ha kane ka jaka ha ka por ba dang long MLA u bah L Mylliemngap lada ka sorkar kam leh ei ei ban iada na ka liang jong u kum u Secretary jong ka Hima um ban se ban iada da kawad ia ki lad kilynti katkum ka ain.
