Shillong, Kyllalyngjot 03: Ka Kong Riiohlang Dhar, sa shisien pat ka la shah jied ba kan rung biang pat shaka thup jong ka FIFA Refereeing International na ka bynta u snem 2026.
Ia kane la pyntip lyngba ka Referee Department jong ka synjuk All India Football Federation’s (AIFF’s) bad ia kane ka khubor la pyntip sha ka Meghalaya Football Association (MFA) ha ka 31 tarik u Nohprah 2025.
Kumba ka long ka kong Riiohlang ka kiew haduh ka kyrdan jong ka FIFA-level assistant referee, bad ka dei ruh ka kynthei kaba ar ha ka ri ha kaba ka la ioh ruh ia ka kabu ksiar ba kan don bynta ban pyniaid ia ki lympung bah ialehkai kum ka World Cup at 2024’s FIFA U-17 Women’s World Cup ba la long ha Dominican Republic.
Dei ha une u juh hi u snem ba ka kane ka samla kaba trei ruh ha ka tnat pulit ka jylla ba ka a shah jied ruh ban leit ban pyniaid ia ka AFC U-17 Women’s Asian Cup kaba la long ha Indonesia.
Ha u Jymmang u snem 2025, ka la ioh ba kan rah ia ka khusnam Female Assistant Referee of the Year da ka AIFF naka bynta ka samoi ialehkai u snem 2024-25.
Dei halor kine ki mawjam baroh ba ha u bnai Nohprah u ba dang shu dep, ka liang ka MFA ka la wan shakhmat ban pynkup burom ia ka lem ha ka janmiet pynkup burom (award night) ia ki khlur ialehkai jong ka jylla, kaba dei artad ka janmiet ban plie ia ka jingrakhe ia ka jingdap ba 50 snem jong ka MFA.
