Shillong, Naiwieng 30: Ka jingialang jong ka East Khasi Hills District jong ka Synjuk Ki Rangbah Kur Ka Bri U Hynniewtrep (SRKBH) kala long mynta ka sngi ha iing dorbar jong ka shnong Mission. Ha kane ka jingialang la jied ia u Bah Kynsai Manik Syiem kum u President jong ka East Khasi Hills District Kommittee.
Kiwei ki nongkit kam ki long u Bah R.Livingstone Kharpran u la shah jied kum u Secretary, u Bah J L Khongshei kum u nongbat ia ka pla tyngka. Ha kane ka sngi la jied ruh sa 18 ngut kiwei ba kin long ki nongkit kam hapoh ka executive Committee ka seng.
U Bah Herman Nongrum president jong ka seng kmie ka SRKBH u la pynskhem ia ki nongkit kam ha kane ka sngi. Na ka liang jong u president u la pynpaw ia ka jingsngew kmen ka jong u ban iohi ba ia ka District Committee jogn ka East Khasi Hills la lah ban pynskhem mynta ka sngi.
La ong, na ki 6 tylli ki District kiba don hapoh jong ka lum khasi la lah ban don lai tylli ki District Committee, ka West Khasi Hills District, East Khasi Hills District ia kaba la pynskhem bad ka South West Khasi Hills District ia kaba yn sa pynskhem ha u snem thymmai.
Na ka bynta ki lai tylli ki District kiba dang sah, ka Ri Bhoi District, ka East Jiantia Hills District bad ka West Jiantia Hills District ka jingiakren kala iaid sha khmat bad kyrmen ba shen kin sa ioh ban plie noh ia ka jingtrei kam hapoh jong kitei ki lai tylli ki District ruh kum juh.
Ha ka jingkren jong u bah HS Shylla President ba rim jong ka SRKBH, u la ong ba u don ka jingiohi ba lyngba kane ka synjuk yn lah ban trei na ka bynta ka Ri bad ka Jaitbynriew .
U la ong ba na ka liang jong u u ai ka jingiaroh kane ka sorkar kaba la wanrah ia ka jingpnykylla ia ka Meghalaya Residence Safety and Security Act, ha ka juh ka por ka burom ka leit ruh sha ka sorkar ba la leit noh kaba pynlong ain ia ka MRSS Act kaba la long kaba don kam.
Kum ka jaidbynreiw kaba rit paid ka don kam ia ka jingiada hapoh ki kyndon jong ka ain, u la kyntu ba U Lat jong ka jylla u la dei ban ai noh ia ka jingmynjur jong u ia ka MRSS Ordinace ban ioh ia ka jingiada na ka jingwan tuid ki briew na shabar.
Ha kane ka jingialang la iakren ruh ha kaba ia dei bad ka “Clan Bill” kaba u Lat jong ka jylla u la phah biang sha KHADC da kaba pan jingpynshai, la ia kren ba khlem don ka ain kan long kaba eh ban pyniaid iaki kur , kumta ka SRKBH kala sengew dei ban kyntu ia ki bor jong ka KHADC ba kin pynlong ain noh ia ka Clan Bill.
