Shillong, Lber 16: Mynta ka sngi ka iing dorbar jong ka Garo Hills Autonomous District Council kala jied ia u Dhormonath C H Sangma kum u Chief Executive Member khlem da don baia leh pyrshah ka jingpynlong iaka elekshon la leh katkum ka AD Rule 33.
Ka jingjied ia u CEM bathymmai jong ka GHADC hadien ba u Albinus R Marak ula hiar shuki noh sa ban poi ka jingiatynjuh bor hapoh ka iing dorbar kaba u lat ka jylla ula khot iaka jingiashong dorbar kaba kyrpang mynta ka sngi.
Katkum ki khubor kiba la ioh la iathuh ba mynta ka sngi la jied ruh iaki kyrteng ban don ha ka Executive Committee kiba thymmai, ia ki kyrteng yn sa phah sha u lat ka jylla ban ioh iaka jingmynjur ka jong u, la khmih lynti ba kan nym don ka jingpynslem ban ioh iaka jingmynjur.
Ki nongpeit pyrman haba iadei bad ka sain pyrthei ha Garo Hills ki pynsngew ba kane ka EC ba thymmai kan don ia ka jingkitkhlieh kaba khia namar ki paidbah ki angnud ba dei ban don da ka rule ba ki bym dei ki ri lum kin nym ioh ban ia shim bynta ha ka MDC elekshon.
