Shillong, Nailar 24: Na ka daw jong ka jingjur palat jong u slap ka shnong Byrnihat mynta ka sngi kala shah lynshop ha ka jingshlei um ha kaba bun ki long iing kila hap ban kynriah sha ki jaka kiba kham shyngian.
U Bah Sosthenes Sohtun MLA jong kane ka jaka haba kren ha u SP News Agency u la iathuh ba ka jingslei um mynta ka sngi kala jur bha haba bun na ki iing ki la shah ktah ha ka um bad kaba kham shah ktah eh dei ka skul St Jude Secondary School Upper Ri Bhoi District.
La iathuh ruh ba kala don ka jingtwa khyndew ha dong Tamulkuchi bad ha kane ka jingjia u wei u rangbah u la duh ei iala ka jong ka jingim na kane ka jingtwa khyndew. Ia kane ka jingjia na ka liang jong u MLA kane ka jaka u la pyntip sha ka DC jong ka Ri Bhoi District ban phah jurip.
U Bah Sohtun u la iathuh ba la shai ka sngi un leit ban jurip da lade ha kaba u la khot lang ia u heh jong ka MeECL, jong ka Block Umling bad kiwei kiwei ki heh sorkar khang. La ong ba ka jingjulor ha kane ka jingshlei um kala bun bad kaba la shah ktah palat dei ka St Jude ha kaba ka mala kaba sha poh jong ka skul kala shah tah ha ka um.
Na ka liang jong ka Deputy Commissioner jong ka Ri Bhoi District ka Kong RM Kurbah kala iathuh ba kala ioh ia ka jingpyntip na u MLA jong kane ka jaka ha kaba ia dei bad kane ka jingshlei um bad ka jingiap briew na ka daw jong ka jingtwa khyndew.
Ka DC kala iathuh ba mar ia ioh ia kane ka jingtip kala phah ia ki magistrate ba kin leit ban jurip ban lap ia ka jingshisha bad ha kane ka jingleit jurip la lap ba u wei u samla ba 22 snem ka rta u ka khlad na ka daw jong ka jingtwa khyndew bad ar ngut ki kynthei kila mynsaw.
