Shillong, Nohprah 12: U myntri rangbah ka jylla u Conrad K Sangma mynta ka sngi ryngkat bad u myntri ba dei peit ia ka tnad ka koit ka khiah u bah Wailadmiki Shylla la liet ban jngoh ia ka Shillong Medical College kaba don Lawmali Shillong, ha ka jingdonlang ki ophisar.
Haba kren ha ki samla pule u myntri rangbah u la pynpaw ia ka jingsngew kmen ban iohi ba ki jinghikai kila sdang ia ka jinghikai pule doctor ia ki khynnah kiba la ioh ban rung nyngkong eh ha kane ka jaka pule doctor.
Kane ka jaka pule ka long ba don kam haduh katta ia ka jylla Meghalaya bad ia kane ka jaka pule ynsa wan ban plie da u myntri rangbah duh ka Ri India, katba dang ap ia kane ka jingwan plie la hap ban sdang noh ia ki jinghikai ban nym sepei ka por.
La ong ba kane ka jaka pule ka long kaba la buh shibun ki jingeh, hynrei ka jingkhublei ka leit sha ka Dr M Ampareen Lyngdoh ka myntri ka tnad ka koit ka khiah kaba mynshuwa bad ki ophisar kiba la trei shitom ban pynlong ia kane ka jaka pule Doktor.
La ong ba ki dang don shibun ki jingeh hynrei na ka liang ka sorkar kala kut jingmut ba kane ka jaka pule kan long kaba kongsan eh na ka bynta ka sorkar, la ai khublei ia ki doktor kiba la ai buid bad bor ban pynlong ia kane ka jaka pule doctor kumba kila ioh sdang mynta.
La kyntu ia ki samla pule ba kin rah ia kanam ka burom kum ki samla kiba dang pule nyngkong ha kane ka Medical College, ha ka juh ka por u la ong ba kim dei ban don kano kano ka jingartatien namar ba dang sdang thymmai kin don beit ki jingduna hangne hangtai.
