New Delhi, Naitung 21: Shi sngi shuwa ban sdang ka drbar mang tyngka 2024-2025 jong iing dorbart Lok Sabha kaba 18 ka sorkar khot ia ka jingialang ia baroh ki nongialam seng sain pyrthei hapoh ki ar tylli ki iing dorbar, Lok Sabha bad Rajya Sabha.
Ia kane ka jingialang jong ki nongialam jong ki seng sain pyrthei hapoh ki iing dorbar la pyniaida da u myntri iada ri u Rajnat Singh bad kane ka dei ka jingialang kaba nyngkong jong ki nongialam hapoh ki iing dorbar ha kane ka iing dorbar kaba 18 kaba la pdiang burom ia ki baroh.
Ha ka jingkren ban plie ia ka jingialang u myntri ba dei peit ia ka Parliamentary Affairs u Kiren Rijiju la ong ba ka dorbar mang tyngka kan sdang la shai ka sngi 22/Naitung/2024 bad kan kut ha ka 12/Nailar/2024, ka dorbar kan ia shong 12 sien ha ki 22 sngi bad ka jingiakren kaba bun kan long halor ka mang tyngka 2024-2025.
Ia ka mang tyngka yn wan rah hapoh Lok Sabha ha ka 23/ Natiung/ 2024 ha kine jingiashong dorbar kin don ruh kiwei ki kam kiba ka iing dorbar kan ia kren, kum ka mang tyngka ia ka Union Territory jong ka Jammu bad Kashmir.
Ha kane ka jingiashong dorbar kin don ruh 6 tylli ki bill kiba ka sorkar kan sa wanrah bad kita kin long ka The Finance (No. 2) Bill, 2024, The Disaster Management, (Amendment) Bill, 2024, The Boilers Bill, 2024, The Bhartiya Vayuyan Vidheyak, 2024, The Coffee (Promotion and Development) Bill, 2024, The Rubber (Promotion and Development) Bill, 2024.
U Myntri b dei peit ia ka Parliamentary Affair, la ong ba ka sorkar ka long kaba la kloi ban ia kren ia kino kino ki bynta kiba long hapoh ki kyndon jong ki rule kiba la don ha kaba ia dei bad ka jingpyniaid ia ka dorbar. Ha kane ka jingialang la don lang ruh u myntri ka koit ka khiah u Jagat Prakash Nadda,u myntri khynnah u Arjun Ram Meghwal,u myntri khynnah Dr. L. Murugan.
U Myntri iada ri u Rajnath Singh u la ai khublei ia baroh ki nongialam jong ki seng sain pyrthei kiba la wan ban ia shim bynta ha kane ka jingialang bad u kyntu ban bat ia ka burom jong ka iing bad ban ia kren katkum ki rule, na ki 41 tylli ki seng sain pyrthei kiba don ia ki MP kiba la ia poi ki long sanphew san ngut.
