Shillong, Lber 31: U nongialam ka liang pyrshah ka Khasi Hills Autonomous District Council u bah Titosstarwell Chyne u la ong ba kum ki MDC ka liang pyrshah kila ioh ban ia kynduh ia u Chief Executive Member u bah Winston Tony Lyngdoh ban ia kren halor ki lai tylli ki mat kaba ki kwah ban ioh jingshai na ka Executive Committee.
Haba kren ha ki lat pathai khubor mynta ka sngi 31/ Lber/2026 u nongialam ka liang pyrshah u bah Titos u la ong ba ka mat kaba nyngkong kaba ki kwah ban ioh jingshai ka dei halor ka jingshah weng kam shipor u Secretary ka Executive u bah D.G. Syiemiong.
Halor kane u CEM u la pynshai ia ki MDC ka dei namar ka jingbymbiang ha ka jingtrei kam hapoh ophis khlem da ioh ia ka jingmynjur na ka EC, na u EM ba dei peit bad kumjuh na u CEM ha kaba la sain ia ka affidavit kaba dei ban thep nokol sha Meghalaya High Court.
U nongialam ka liang pyrshah u la ong ba ha kane ka jingiakynduh kila pan ka jingpynshai la ka don ne em ka jingiadei bad ka jingai nokol bad ka jingweng kam shipor ia u secretary ha kane ka bynta u CEM u la ong ba kam don jingiadei eiei hynrei ka dei tang ka jingdkoh ha ka rukom trei kam khlem da iaid lyngba ka EC.
Ha kane ka jingiakynduh ki MDC ka liang pyrshah kila dawa ba dei ban don ka jingtohkit, ia kane ka bynta u CEM u la ong ba kala don ka jingphah tohkit bad kum ki MDC ki kwah ban iohi ba ia ka kaiphot dei ban pyndep shwa ban shongthait u secretary na ka kam.
Haba iadei bad ka jinghiar shuki noh u muktiar ka District Council u bah Themis Diengdoh na ka liang jong u CEM u la pynshai ba ka jingrisain noh ka dei na ka daw jong u shimet bad kam don jingiadei eiei bad ka jingai nokol sha Meghalaya High Court.
U nongialam ka liang pyrshah u la ong ba u pynpaw ka jingsngew wit ba hadien ka jinghiar shuki u bah Themis Diengdoh kum u muktiar ka District Council la thung noh da u wei u bym dei na ka jaitbynriew ne para doh para snam halor kane u CEM u la pynshai ba duna palat ki muktiar bala rangbah kiba dei ki Khasi kumta la thung shipor ia u muktiar jong ka KHADC u bym dei u na ka jaitbynriew jong ngi.
