Shillong, Rymphang 14: Ka 
NEC Shillong, IIM Shillong bad ka Tnat DoNER ki la iasoh ia ka MoU ban bteng ka jingtreikam jong ka Dr. APJ Abdul Kalam Centre for Policy Research and Analysis kaba don ka jingiadei ba kham khlain bad ka IIM Shillong ha ka 13-02-2024 ha NEC Secretariat, Shillong bad ka Tnat DoNER ka la iasoh lang lyngba ka weblink.
Ia ka MoU la soi da u AngshumanDey, Joint Secretary MDoNER, u Moses K Chalai, Secretary, NEC bad Prof. D.P Goyal, Director, IIM Shillong ha ka jingiadonlang u Chanchal Kumar, Secretary, MDoNER bad kiwei kiwei ki heh ophisar jong ka DoNER, NEC bad IIM Shillong.
La seng ia ka Dr. APJ Abdul Kalam Centre for Policy Research and Analysis lyngba ka jingiateh soskular hapdeng ka IIM Shillong bad ka Tnat Development of North Eastern Region (MDoNER) bad ka North Eastern Council kaba la iasoi ha ka 15 tarik Risaw 2016.
Ka jing thmu kalong ban wanrah ia ka jaka pdeng kaba la bit la biang katkum ka juk mynta ban ai jingiarap ia ki jylla jong ka thain shateilammihngi jong ka ri bad ki kynhun ba pyntreikam ia ka jingsaindur bad pynurlong ia ki projek, kyntiew ia ki jingsaindur thymmai bad ka treikam kum ka jaka Pdeng jong ki rukom treikam ba seisoh tam ha ka thain.
Ha ka jingai jingkren ha ka jingialang u Prof D P Goyal, Director, IIM Shillong u la pynpaw ka jingkmen jong u bad kren shaphang ka pateng kaba riewspah jong u President Dr. A P J Abdul Kalam (bam kwai ha dwar u Blei) bad ka thong jong u na ka bynta ka roi ka par.
U la kren shaphang ki sienjam ba kongsan bad ki kam jong ka Dr Kalam Centre ha kine ki snem. U la ban jur ba ka jingbtengia ka MoU kan nang pynkhlain shuh shuh ia ka jingiadei hapdeng ki lai tylli ki agency ba kongsan bad pynkhlain ia ka jingkut jingmut na ka bynta ka roi ka par jong ka thain shateilammihngi.
U Moses Chalai, Secretary NEC u la pynpaw ka jingsngew hun jong u halor kumno ka Centre ka la kiewkatkum ka jingkhmih lynti. U la kyntu ia ka centre ba kan peit sani bha ia ki polisi, ki jingbthah jong ka sorkarpdengkatkum ka jingangnud jong ka thain ban pynlong ia ki kiba shitrhem.
U la pynpaw ka jingkmen halor ka jingpyndepia ka jingtei ia ka administrative building jong ka Dr APJ Abdul Kalam Centre kaba la bei tyngka da ka Tnat DoNER lyngba ka NEC.
U Chanchal Kumar, Secretary, Tnat DoNER u la kitbokkitrwiang ia ka centre ka ban long ka think tank kaba kongsan jong ka thain. U la kren shaphang ka jingdonkam ban wanrah ia ka North East Development Fellows lyngba ka Dr.Kalam Centre na IIM Shillong ka ban iarap bha ban ai ka jingsynshar kaba bha ha ka thain. U la pynthikna ban ai baroh ki jingkyrshan na ka Tnat DoNER ban kyntiew ia ka centre.
U AtulKulkarni, Member, Board of Governors, IIM Shillong uba la iashim bynta lyngba ka bor internet u la kdew ia ka jingkongsan jong ka Dr Kalam Centre ban pynurlong ia ki jingangnud jong ka thain, la kalong ha ka jingseng kam lajong, ka pule puthi, ka jingthaw ia ki polisi lane ka jingai jinghikai, bad ka jingplie lad ia ka Sorkar jylla ba kan ai ka jingsynshar kaba bha.
Lyngba ka jingbtengia ka MoU, ka Dr.Kalam Centre kan nang trei borbah bad ka jingskhem jingmut. Ka Dr.Kalam Centre kan trei hapoh ki katto katne ki bynta ba kongsan, ba kynthup,Ka jingai jinghikai bad ka jingkyntiew. Ka jingwad bniah bad jingialam lynti ,Ka jingiarap ha ki polisi .Ka jingsam jingtip bad Ka jingiadei bad ka imlang sahlang.
Ka jingthmu ki long, ban long kum ka ‘think tank’ na ka bynta ka thain shateilammihngi lyngba ka jingpyntreikam ia ki rukom treikam ba seisoh tam, ka jingai jingmut, ka jingantad bad ki rukom treikam ban kyntiew ia ka thain shateilammihngi kum ka thain kaba don ka bynta kaba heh ha ka roi ka par jong ka ri.
Ban ai jingtip halor ka jingseisoh bad jingiaineh jong ka jingpyndonkamia ki jingdon jingem ha ka thain shateilammihngi.Ban ai ka rukom treikam halor ka jingpyntreikam ia ki polisi bad ki prokram jong ka Tnat DoNER ha ka thong jong ka ban pynsted ia ka jingkiew ka imlang sahlang.
Bad kane kan long ruh ia ka ioh ka kot ha ka thain shateilammihngi bad ai jingiarap ia ka Tnat DoNER bad NEC ban wanrah ia ka rukom treikam na ka bynta ka roi ka par jong ka thain shateilammihngi ha ka jingiamir jingmut bad kiwei kiwei ki kynhun ha ka thain shateilammihngi.
Ban iarap ha ka jingkyntiew ia ki sap ha ka thain da kaba iarap ia ki jaka pule ban pynkhreh ia ki jinghikai bad ka jingpyntbit ia ki ophisar kiba iadei bad ka jingpyntreikam ia ki polisi bad ki prokram jong ka Sorkar Pdeng bad ki Sorkar Jylla.
Ban iatreilang bad kiwei kiwei jaka treikam ha ki bynta bapher bapher ba iadei bad ka roi ka par jong ka thain shateilammihngi bad ban wanrah ka rynsan na ka bynta ka jingiatreilang ha ki kam wad bniah, ka jingpeit bniah bad ka jingialam lynti ha ryngkat kiwei kiwei.
Ban sdang ia ka jingwad bniah halor ka mat ba iadei bad ka roi ka par jong ka thain shateilammihngi ryngkat bad ka Tnat DoNER, NEC bad ki jylla lane ki briew bad ban ithuh ia ki jaka ba suda ha ki prokram/ skhim pynroi ha ki shnong jong ka thain shateilammihngi na ka bynta ka jinglah treikam kham bha.
Ban kyrshan ia ka jingkyntiew ia ka ioh ka kot ha ka thain shateilammihngi lyngba ka jingsaindur thymmai bad ka jingseng kam lajong ha ki kam ba don ki lad ki lynti. Ban ithuh ia ki kam ba donkam na ka bynta ka jingkiew ka jingshalan mar na ka thain shateilammihngi da kaba lum jingtip shaphang ki iew.
Ban iarap ha ka jingwanrahia ki buit ba thymmai bad ki jingtip ha baroh ki bynta ban pyntreikam ha ka thain shateilammihngi.Ka Dr Kalam Centre bad ka Resource Centre ha ka NEC kin iatreilang ban pynkhlain lang ia ki lad ki lynti da kaba kiar ia ka jingtrei arsien ia kajuh ka kam.
La khmih lynti ba ka Centre kan iatreilang bad ka North Eastern Council, ki Jylla bad ki kynhun ba pawkhmat jong ka thain shateilammihngi kumjuh ruh ki kynhun jong ka ri ban pynseisoh ia ki lad ki lynti na ka bynta ka roi ka par kiba don ha ka thain.
