Shillong, Iaiong 23: Ka Jaintia National Council kala ioh ban kem ia sang ngut ki khar Bangladesh mynta ka sngi ka 23 tarik u Iaiong, kiba la wan rung tuh beain sha u pud u sam jong ka East Jaiñtia Hills district khlem da don ki kot ki sla kiba biang.
Ia kane ka kynhun la ialam da u Bah Ency Shadap uba dei u Chairman jong ka Employment Commission, ha ryngkat bad u Bah Mebanteilang Sukhlaiñ, uba dei u Secretary jong ka Commission bad u Assistant Secretary ka JNC u Bah Allmiki Ryngkhlem.
Ia kine ki briew la ioh ban kem na National Highway kaba don ha East Jaiñtia Hills district bad ha ka jingtohkit kila pynpaw ba ki don ki briew kiba iarap ia kaba la tip kum ki dalal kiba shim pisa hapdeng shi hajar bad ar hajar tyngka marwei ban iarap ban pynpoi sha shilliang.
Ka jingthmu ba kongsan jong kine ka long ban wan kam bylla ha ki kharkhana dewbilat kiba don ha Umpleng jong ka East Jaiñtia Hills. Hadien ka jingtohkit ka JNC kala leit ban aiti noh ia kine sha u officer in charge jong ka infiltration kaba don ha Umtyr-a, East Jaiñtia Hills ba kin leh ia kaba donkam.
Une u Ophisar ula ai ka jingkular ban sa shim ia ki sienjam kiba donkam ban shim kynthup ruh ka jingujor suo moto case pyrshah ia ki briew kiba pynrung tuh.
Halor ka jingioh rung suk kine ki khar Bangladesh, u Bah Ency Shadap u la pynrem jur ia ki shipai Border Security Force (BSF) ba kim shym la shim khia ia la ka kamram ha kaba iadei bad kane ka mat.
Ka council ka la pynrem ruh ia ki dalal trai ri kiba, ba tang na ka bynta ka jingsiew barit ki kloi ban leh ia kino kino ki kam kiba lah ban pynthut ia ka imlang ka sahlang bad kila kular ban leh da kaba tyngeh ia kine ki dalal.
