Shillong, Jylliew 26: Kum ka jingrakhe ia ka International Day Against Drug Abuse and Illicit Trafficking bad ka ‘NashaMukt BharatAbhiyan’, ka tnat Customs ka la pynlong ia ki prokram ai jingtip bad ruh ka jingpynduh ia ki drok ba la ioh kurup ban pyni shuh shuh ia ka jingkut jingmut jong ka ban ialeh pyrshah ia ka jingpyndonkam bad ka jingshalan ia ki drok.
Shi taiew shuwa ka 26 tarik u Jylliew, 2024, ka tnat Customs ka la pynlong ia ki prokram ai jingtip ha Kendriya Vidayalaya GC, Agartala, Government Boys Higher Secondary School, Dhubribad ha Govt. Chawnpui High School, Aizawl da ka jingthmu ban ai jingtip ia ki khynnah skul shaphang ki jingma kiba wan na ka jingpyndonkam ia ki drok, ka jingkongsan ban im ka jingim kaba koit ka khiah bad ka jingkiar ia ki drok.
Ka tnat Customs ka la pynlong ia ki prokram ai jingtip ha KRIPA Foundation De-Addiction Centre for Children, Shillong bad New Hope De-addiction cum Counselling Centre, Shillong ha ka 25 bad 26 tarik u Jylliew, 2024.
Ia ki kamram bad ki sienjam jong ka tnat la pyni bad ka la don ruh ka bynta bad ka Dr. Jasmine M Lyngdoh, Clinical Psychologist bad Director, Routes, Shillong ha kaba la iakren shaphang ka jingktah jong ka jingdih drok jingdih kyiad bad la ai jingmut ruh shaphang ki lad ki lynti ban lait na kane ka jingkyrni. La sam ruh ia ki tiar ialehkai sha ki nongpang ban kyntiew ia ka koit ka khiah jong ki.
Ha ka sienjam ban pyni ia ka jingieng skhem pyrshah ia ka jingkhaii drok, ka tnat Customs ka la pynlong ia ki prokram ban pynduh ia ki drok ba la ioh kurup ha Assam, Manipur, Meghalaya bad Mizoram.
Ha kane, la pynduh noh ia 12.48 kilo u Heroin, 45.27 kilo ki kuli drok Meth/Yaba, 5804.78 kilo u kynja bad 66728 bilor ki dawai jyrhoh ba don Codeine kiba kot lang sha palat T. 167.47 klur.
Ia kane ka kam la leh ha ka rukom kaba shngain bad ka bym ktah ia ka mariang da kaba pynthikna ba kine ki mar ba pynsniew kin ym don lad ban pyniaid iew shuh.
Ka tnat ka ieng skhem ha ka kam jong ka ban iada ia ka imlang sahlang na ki jingma kiba wan na ka jingpyndonkam bad jingshalan ia ki drok. Da kaba pynlong ia kine ki prokram ai jingtip bad ka jingpynduh ia ki drok, ka Customs ka thmu ban pynduna ia ka jingpyndonkam ia ki drok bad ruh ban ai jingkyrshan ia ki sienjam ha kylleng ka pyrthei ban ialeh pyrshah ia ki kam khaii drok.
