Shillong, Jylliew 13: Ka KSU Laban mynta ka sngi kala phah da ka jingthoh sha u bah Sanbor Shullai ban pynpaw ia ka jingsngew pyrshah ka jong ka seng ia ka jingpynkylla kyrteng ia ka Zig-Zag Road kaba don ha Kaban sha ka Ardhendhu Choudhuri Road khlem ka jingai jingbit jong ka dorbar shnong, Kenches Traces Oxford Rilbong.
Ha ka shithi kaba kila phah mynta ka sngi kala pynpaw ia ka jingsngew bynniaw ia kane ka jingpynkylla kyrteng khlem da shah skhor ia ka jingkyrpad jong ka seng. Ka seng kala ong ba kam don ei ei pyrshah ia u MLA barim bam kwai ha dwar u Blei, hynrei kim lah ban pdiang ia kane.
Haba ia dei bad kane ka dorbar shnong ha ka jingialang kaba la long ha ka 14th Lber 2019 kala ai jingmut ba ia kane ka surok dei ban ai ha ka kyrteng jong u Rangbah shnong ba rim u bah Dapstarlin Mawlong bam kwai ha dwar u blei u ba ai ka jingshakri 25 snem kum u rangbah shnong lane ha ka kyrteng jong u bah HS Lyngdoh u wei na ki nongmih khmat ba rim tam bala bam kwai ha dwar ublei.
Haba ia dei bad kane ka dorbar shnong bad ka seng kala kdew ha ka shithi ba kila ia kren bad u MLA bah Sanbor Shullai bad ha ka jingiakren la kular ban peit ia kane hynrei ka kylla long da khongpong pynban la kdew ka KSU ha ka shithi mynta ka sngi.
Haba ia dei bad kane ka KSU Laban ka pynpaw ia ka jingpyrshah jur halor kane ka daw kaba nyngkong ka long ba ka Dorbar shnong kam shym la ai kano kano ka jingbit. Dei halor kane ba ka KSU mynta ka sngi kala pynlong ia ka jingrah plakard ban pyrshah ia kane ka jingleh jong ka sorkar.
Haba ia dei bad kane ka KSU kala phah ruh ia ka shithi ban pynpaw ia ka jingsngew pyrshah jong ka ha u myntri ba dei peit bah Comingone Ymbon ha ka 24th Iaiong 2019 bad ka KSU kala ioh ruh da ka jingthoh na ka dorbar shnong ha ka 15th Lber ba ka shnong ka khlem ai ia ka NOC ban pynkylla ia ka kyrteng jong ka surok.
