Shillong, Nailur 02: U Myntri Rangbah ka Jylla Meghalaya, Conrad K Sangma u la ai ka jingkular ban shim khia hi dalade halor ka jingdawa ban kyntiew kyrdan noh ia ka Mawryngkneng Public Heath Centre sha Community Health Centre kumba la dawa da ka Synjuk ki Hynriew Sordar Shnong.
Ia kane la iathuh da u MDC ka Sohryngkham Constituency, Bah Pynïaid Sing Syiem uba dei ruh u Chairman ka Khasi Hills Autonomous District Council (KHADC) haba kren ha ka jingialang aiti ia ka Ambulance lyngba ka Chief Minister’s Relief Fund (CMRF) sha ka Mawryngkneng PHC ha ka Sngi Balang.
“Ia mynta u Myntri Rangbah u dang pan ia ki report ba bniah na ka tnad ka Koit ka Khiah ka Sorkar Jylla bad u la kular ban shimkhia dalade halor kane ka jingdawa”, la ong u Bah Pynïaid Sing Syiem. “Ka dei ka jingdawa kaba don nongrim da ka Synjuk ki Hynriew Sordar Shnong kane ka thaiñ”, la ong une u nongmihkhmat.
“Ha ka jingiakynduh dang shen na ka liang jong nga bad ki Nongialam Shnong ha ka Synjuk, ngi la pynsngew sha u Myntri Rangbah halor ki jingdonkam kum ki dawai dashin bad kiwei pat ha ka PHC. Ngi la ia kren ban pynkynriah ia kane ka PHC na kane ka jaka ba don mynta sha ka buliding ba thymmai”, la ong u Bah Pyniaid.
Da kaba ai khublei ia u Myntri Rangbah ka Jylla, u Bah Pyniaid u la ong, “Ka long kaei kaei kaba sngewtynnad ba u Myntri Rangbah tang hadien ka jingiakren myn ha ka 28 tarik u Nailar, mynta ka sngi ngi la ioh ban aiti ia ka Ambulance ban iarap ia ka jingdonkam ka PHC, kaba la 30 snem mynta naduh u 1987, ha kaba ai ka jingshakri ia ki nongshong shnong ka thaiñ”.
Kum ban shu kdew ka la don ka jingsngew pyrshah kaba jur na ka Synjuk ki Hynriew Sordar Shnong (Mawryngkneng, Pommura, Thangshalai, Kut, Puriang, Ksehpyndeng) halor ka jingbym bat kular ka tnad ka Koit ka Khiah ban pynkynriah ia ka PHC na ka jaka ba don mynta sha ka jaka ba thymmai ha kaba ki nongialam ki la mut ban pynlong ka jingialang ia khih pyrshah myn ha ka 28 tarik u Nailar.
Hynrei u MDC ka thaiñ, Bah Pyniaid Sing Syiem u la shimkhia ban ia phylliew jingmut shwa bad ki ha ka 27 tarik u Nailar bad pynjem ia ki da kaba ialam lynti ban ia kren bad u Myntri Rangbah ha ka 28 tarik u Nailar ha kaba ki jingiakren halor ki jingdonkam ka PHC baroh ki long kiba shai.
Kiba la ia donlang ha kane ka sngi ki kynthup ia u Bah Roni Wahlang, BDO Mawryngkneng C&RD Block, Dr A Kharduit, Dr in-charge Mawkynrew PHC lem ki nongtrei, u Chairman ka Synjuk ki Hynriew Sordar Shnong, Bah Peter J Lawai uba dei ruh u Sordar ka Mawryngkneng, u Bah Klin Kharsati, Chairman BDMC ka Mawryng kneng C&RD Block, uba la pyniaid ia ka jingialang, ki bor pulit na Mawryngkneng PS, ki nongialam ka NPP, ki nongialam shnong, ki nongtrei ASHA bad Aganwadi lem kiwei kiwei pat.
