Shillong, Jylliew 20: U bah Lambor Malangniang Chairman jong ka Meghalaya State Planning Board, u la ong ba u Myntri Rangbah ka jylla u Conrad K Sangma ym juh tuklar ia ka jingtrei kam jong ki myntri sorkar bad lada ka don ka jingbym lah trei kam ka shong ha ki minister shimet.
Haba kren ha ki lat pathai khubor haba ia dei bad ka jingtrei kam jong ka sorkar, u Bah Lambor u la ong ba ha ka jingtrei kam jong ka sorkar ka juh don ka jingkiew ka jinghiar, ym lah ban ong ba ka sorkar ka leh bha 100% lane ka sorkar kam lah trei kam 0%, hynrei la iohi ka jingtrei kam jong ka sorkar kham tam ha kane ka jingialeh pyrshah ia ka khlam COVID-19.
Haba ia dei bad jingtrei kam jong kane ka sorkar ki sngewhun namar la iohi ba bun bah ki kam pynroi kila iaid sha khmat, kumba ka long mynta hap ban ia ap haduh ba kan iaid beit iaid ryntih ka jinglong jingman ka mariang hangta lah ban iohi ka jinglah trei kam ne ia ka jingbym lah trei kam.
Halor ka jingkynnoh ba ki don kiba leh donbor ha kane ka sorkar, kane ka dei ka jingkynnoh kaba bakla, namar u myntri rangbah ka jylla ym juh tuklar ia kane kaba la bymshed ha ki minister, kaba kongsan ha shong ha ki minister marwei mawei ia ka rukom trei kam kane ka long kaba kongsan. U Bah Lambor u la ong ba khubor kaba u kwah ban phah ka long bay m pat iohi ba kan don kata ka jingleh donbor kam don hi ruh kum katta.
Haba ia dei bad ka jingbym leit thep vote jong u bah Adelbert Nongrum u ba dei u dkhot jong ka United Progressive Forum, u bah Lambor u la ong ba kum u nongialam jong ka kynhun u la leit ban ia kynduh ia u MLA jong ka North Shillong, hynrei u la pynpaw ia ka jingsngew jong u bad kane ka dei ka synshar paidbah ha kaba u ne ka briew ki lah ban pynpaw ia la ka jong ka jingsngew ia kata ym lah ban khang.
U bah Lambor u la kren shai ba u Bah Adelbert u dang dei u dkhot jong ka kynhun Meghalaya Democratic Alliance (MDA) halor ka jingkren jong u bah Prestone Tynsong Symbut Myntri Rangbah ka jylla ha ba ia dei bad u MLA ka North Shillong, la ong ba kane ka dei ka jingpynsngew jong u shimet kam dei na ka MDA, u la ban biang ba u bah Adelbert Nongrum u dang dei u dkhot jong ka kynhun MDA.
