Shillong, Nailar 24: Ka BJYM jong ka Meghalaya, kala thang ia ka dur jong u Navjot Sidhu Singh myntri kabinet jong ka jylla Punjab u ba dei na ka seng Congress. Kane ka jingthang ka long kum ka jingpyrshah ia u ba u leit ban kdup ia u khlieh shipai ka ri Pakistan u Col.Gen. Qamar Bajwa ha ka sngi ba u leit ban ia shim bynta ha ka jingsmai jong u Imran Khan kumu myntri rangbahduh jong ka Pakistan.
Na ka liang jong ka BJYM jong ka Meghalaya State Unit ka pynrem jur ia kane ka jingleh jong u myntri ka jylla Pynjab bad kane ka long ka jingpynjah burom ia ka Ri baroh kawei la kynthoh ka BJYM, namar ha ka sngi kaba u Sidhu u kdup ia u khlieh shipai jong ka ri Pakistan ka dei ka sngi ba u myntri rangbah duh barim jong ka Ri India u Atal Bihari Vajpayee u khlad noh na kane ka sla pytrthei ha kaba ka ri baroh kawei pa sngewsih hynrei u Sidhu u leit sha Pakistan bad leh ia kane ka kam pynjah burom.
Na ka liang jong ka BJYM ka dawa na u tei u myntri jong ka jylla Punjab ba u dei ban pan map ha ki lad pathai khubor khamtam na kiba ha iing ha sem jong baroh kito ki shipai kiba la kylla martir ban ia da ia ka Ri kiba la aiti ia la ka jong ka jingim namar ka Ri. U la dei ban hiar shuki noh mardor kum u mnyntri kabinet ka sorkar jong ka jylla Punjab la ong u Bah Shibun Lyngdoh president ka BJP Meghalaya State Unit.
