Shillong, Jylliew 18: Ka JSU seng kmie mynne ka sngi ka lah phah syndon da ka jingthoh sha ka NGT bad sha ka MoEF&CC ban pyndam noh iaka Environmental Clearance jong ka Star Cement ba lah ai da ka MoEF&CC na Delhi.
Ha ka jingthoh ka seng ka lah pynpaw ba ka Star Cement kam don hok ban ioh iaka EC namar ka lah iaid lait na ka jingpynsngew paidbah bad kane jaka tih mawshun ruh ka don marjan bad markhap bad ki khlaw ki btap ba kyrpang kum ka Narpuh Wildlife Sanctury kaba don tang 1.4 km bad ka Eco-Sensitive ka don tang kumba 0.25 km na kane ka par mawshun bad ki don shibun bah ki kynja mrad ba kyrpang kiba lah jan duh jait noh na kane ka sla pyrthei.
Ki mrad kiba im ha kine ki khlaw bad kan ktah ia kine ki mrad lada ki tih bad pynjot iakane ka par mawshun bad ki lah ban iap bad phet shakiwei ki jaka bad kan wan rah ruh iaka jingkylla ka mariang ha katei ka thaiñ baroh kawei bad kumjuh ruh kan nang wan rah iaka jingjaboh ba shyrkhei iaka wah Lunar kaba don hajan kane ka jaka tih maw bad kumjuh iaka wah Lukha bad ka don ruh ka Umso Nallah ka wah duit kaba don markhap bad katei ka par mawshun
Ka JSU kala kynnoh ba kan wan rah shibun ka jingeh bad ka jingiap pathar ki doh um bad ka jingiap bad jingjakhlia noh kitei ki wah kiba tuid ha kylleng bad kan ktah ruh iaki marjan shnong kiba im na kitei ki wah.
Ka seng ka pynrem jur iaka ophis u DC East Jaintia Hills District bad iaka Meghalaya State Pollution Control Board jong ka sorkar jylla namar ki lah phah da ka jingthoh ban ialam bakla iaka MoEF&CC ban pyndonkam daka para 7 stage 3 clause(v) ban lait noh na ka jingpynsgew paidbah.
Namar ka bor distrik ka tip shai ba kham bun kiba pyrshah na ka liang ki paidbah bad ki kynhun seng bhalang bad u DC u lah ailad iaka Star Cement ban pynbiang da ki jingthoh kaba kham bun kidei ki nongkyrshan namar ka Star Cement la leit ban phah soi shab bun ki paidbah ki ba lui lui ki bym tip shaphang kane ka project jong ki ban pynjot iaka mei mariang.
Ka seng ka buh ruh jingkylli ia u CEM ka JHADC ba balei um mih sha khmat ban pynshai halor kane ka jingleh sop sop ka sorkar bad ka Star Cement ban ioh EC khlem da burom shuh iaka bor jong ki District Council lane iaka khrynit kaba 6 jong ka Constitution of India.
Ka seng ka phah iaka kyrwoh sha baroh ki paid ka bri u hynñiewtrep ba ngim dei ban ia sngap jar halor kane ka phang namar lashai lashi sngi ki company bad ki project heh ka sorkar kin leh lang da kajuh ka lynti kumba leh ka Star Cement lyngba ka jingioh bor na ka sorkar jylla ba kin ioh long trai ne pynjot iaka mei mariang naka bynta ka jingmyntoi shimet.
