Shillong, Rymphang 27: Ka seng Hynniewtrep Integrated Territorial organization (HITO) seng kmie mynta ka sngi ki la leit ban buh da ka jingujor ha khmat ka directorate of Mineral Resources ha lor ka jingioh bat ki dkhot ka seng Ia ki Shallan thok ki ba la pyndonkam da ki nongkhaii dewiong tuh ha ka ban shalan tuh ia u dewiong na kane ka Jylla Meghalaya.
Na ka liang ka Seng ka la leit ban ai da ka jingthoh ha u Director jong kane ka tnad u bah Pius D Sangma ban ujor halor kane ka jinglap jong ka seng HITO ka ba lah ban lam sha ka jinglait ei ka khajna jong ka sorkar Jylla da ka jingdon jong ki briew ba shim kabu.
U la ia thuh ba ka seng ka la iohruh ia ka jingujor halor ka jingkyntait jong u Director ban soi ia ka noobjection certificate khlem ioh ktien shwa na ki bor ba halor wat ha dien ba ki nong khaii ki la dep ban siew ia ka Royalty, ka GST bad ka bid amount hynrei na ka liang u director u la kyntait mardor ia kane ka jingkynnoh ha khmat ki nong ialam jong ka seng.
Ha ba ia kren bad ki ladpathai khubor na ka liang u bah Donbok Dkhar u ba dei u President jong ka seng u la ong ba kane ka jingia kynduh bad u Director jong kane ka tnad ka long ban tip ia ka jingdon u dewieng bad kumjuh ruh ha ka ba iadei bad ka jingshalan ia une u dewiong.
U la ong ruh ba ha ka ba iadei bad ka jingdon jong ki check point na ka liang u director u la ong ba baroh ki don haduh khyndai thylli ki checkpoints. U bah Dkhar u la ong ruh ha ka ba iadei bad ka jingioh ban bat ia ki fake challan na ka liang u Director u la ong ba na ka liang ka office kan sat hung da ka kynhunthohkit khnang ban lap ia ka jingshisha.
U la ong ruh ba ka jingslem jong ka seng ban ai ia ka jingujor sha ka tnad ka dei namar ba kine ki truck ki ba pyndon kam da kine ki challan ki la ioh phet noh bad ki don ruh ki ba pyndon kam da ki number plate ba thok.
U bah Dkhar u la buh ruh ka jingkyntu ia kane ka tnad ba ka dei ban peitngor bha ha ka baia dei bad kine ki challan bad u la buhruh ka jingkyntu ia ki nongkhaii ba kidei ban da peitbha ia kine ki challan ha ba ki thied bad kidei ruh ban da leit ban peit ban pynshisha napoh ka office jong ka DMR khnang ban lait na kine ki challan thok ki bym don tang ia ka seal ne ka sign.
U bah Dkhar u la ong baia kine ki challan ba ki la ioh ban kem ki la leit ruh ban ai da ka jingujor ha poh ki police station hynrei na ka liang ka police station ki la bthah ba kidei ban leit ban ai da ka jingujor sha poh ka DMR khnang ba ka DMR kan ioh ban leh ia ka ba don kam.
