Shillong, Kyllalyngkot 21: Ka kynhun ialehkai gymnastic ka jylla, hapoh ka lama jong ka Meghalaya Gymnastics Association (mga) ki la wan ban iashim bynta sha ka rynsan ialehkai ba la tip ia ka kum ka National School Games Artistic Gymnastics Championship 2025–26, ia kaba la pynlong ia ka da ka the School Games Federation of India (SGFI), naduh ka 15 haduh ka 17 tarik mynta u bnai, ha Sports Authority of India, Salt Lake Stadium, Kolkata.
Ha kane ka kynti, na ka liang ka kynhun ka MGA ka la kiew rynsan ban iakhun ha ka kyrdan ka U-17 bad kiba la mihkhmat ha kane ka kynti ki kynthup ia Bakmenhun Shangpliang, Sa-i Bakor K. Tariang, Raffellia Malngiang, Wansuk Mery Susngi, Wansaphi Bernadette Malngiang, Athilia Susngi.
Ia kane ka kynhun la ialam bad nonghikai artad ia ka da kong Idalin Malngiang, katba kong Lucy Mary Malngiang kala long kum ka manager jong ka kynhun hakane ka jingleit ia shimbynta.
Ka kyrwoh na ka synjuk, ka pynpaw ba wat lada ka kynhun kam shim la lah satia ban khur ia kano kano ka takma na kane ka rynsan iakhun, hynrei ki dap pat da ka jingsngew kmen ban shem bad iohi ba ki khynnah ialehkai ka jylla kila sdang ban kiew pat ha ka jingim ialehkai gymnastic ka jong ki, katno tam lei lei haba ki ioh ia kum kane ka kabu ksiar ban ia kiew rynsan ban aireng pyrshah bad kiwei pat ki samla kiba dei na kiwei pat ki jylla.
Katba hangne ki ioh ia ki jingnang jingtip, ka pynproh ruh ia ka jabieng ka jong ki bad kaba kongsan eh ban iohi ia ka nuska ba kumno kiwei pat ki samla ki pynpaw ia ia la ka jong ka jingtbit ka jong ki, kaba ki khynnah ka jylla mynta ki ioh ban wan rneng sha la iing bad ban im sngi bad minot ban pynleit jingmut naka bynta ka jingim ialehkai gymnastic ka jong ki.
Ka synjuk ka shim ia ka kabu ba kan ai khublei ia ka tnat Directortate of Sports bad Youth Affairs kaba la iarap ban kyrshan lem naka bynta ban ioh phah iakhun ia ki khynnah sha kane ka rynsan iakhun mynta ka kynti.
