Shillong, Naitung 23: U Deputy Chief Executive Member jong ka KHADC u Bah Pyniaid Sing Syiem mynta ka sngi u la wanrah ia ka “Khasi Hills Autonomous District Council (Salaries and Allowances( (Ninth Amendment) Bill, 2019. Ka jingwan rah ia kane ka Bill ka long ban pynkiew tulop noh ia ki MDC hapoh jong ka KHADC.
Katkum kane ka Bill kaba la wan rah mynta ka sngi, ha kaba ka iing dorbar kan dang pdiang ia kane ka bill la sngi Palei kata ka 25thNaitung 2019 bad kan trei kam na naduh 01st Iaiong 2019. Katkum kane Bill ia ka tulop jong ki MDC la pynkiew na ka T.33,250 tyngka sha ka T.89,100 tyngka bad ka jingsiew kaba T.5000/- tyngka la pynkiew sha ka T.20,000/- tyngka bai leit bai wan sha konstitwensi.
Haba ia dei bad u nongialam ka liang pyrshah ia ka bill “Khasi Hills Autonomous District Council (Leader of opposition) (Salaries and Allowances( (Third Amendment) Bill, 2019 la pynkiew na ka T.38,570/- tyngka sha ka T.103,300/- tyngka bad ia ka bai konstitwensi la pynkiew na ka T.4500/- tyngka sha ka T.19000/- tyngka.
Ha kane ka bill kaba la wanrah mynta ka sngi kala kynthup lang ruh ia u Chairman bad Deputy Chairman, CEM bad ki EM jong ka KHADC, na ka bynta jong u Chairman ka jingpynkiew ka long na ka T.38,570/- tyngka la pynkiew sha ka T.103,300/- tyngka bad ia u Deputy Chairman la pynkiew na ka T.37,240/- tyngka sha ka T.99,800/- tyngka katba ka bai konstitwensi ka long mar T.19000/- ia u Chairman bad T.17000/- tyngka ia u Deputy Chairman.
Na ka bynta jong u Chief Executive Member jong ka KHADC la pynkiew na ka T.39,900/- tyngka sha ka T.106,900/- tyngka, ka bai Konstitwensi pat ka long T.20000/- tyngka. Katba ki EM la pynkiew naka T. 38,570/- tyngka sha ka T.103,300/- tyngka.
