New Delhi, Kyllalyngkot 04: Ki kam ri dohkha ki don ka bynta kaba heh ha ka ioh ka kot jong ka India bad ki plie lad kamaijakpoh na ka bynta kumba 3 klur ngut ki nongri bad nongtongdohkha bad ki ai lad kamaijakpoh ruh ia kito kiba iadon bynta ha kiwei kiwei ki kam kiba iadei bad kane ka kam.
Ka India ka don ha ka kyrdan kaba ar ha kaba iadei bad ka jingpynmih ia ki dohkha bad ka don ka bynta kaba 8% ha ka jingpynmihdohkha ha kylleng ka pyrthei, ka don ha ka kyrdan kaba ar ha ka jingpynmihdohkha na ki jaka ri dohkha.
Ka don ha ka kyrdan kaba nyngkong ha ka jingpynmih bad jingshalan ia ki shymprong, bad ka don ha ka kyrdan kaba lai ha kaba iadei bad ka jingpynmih ia ki dohkha ba shukem.
Naduh u 2015, ka Sorkar India ka la buh kyrpang T 38,572 klur lyngba ki sienjam ba kyrpang kum ka Blue Revolution Scheme, Fisheries and Aquaculture Infrastructure Development Fund (FIDF), Pradhan Mantri Matsya SampadaYojana (PMMSY), bad ka sub-scheme jong ka, PradhanMantri Matsya Kisan Samridhi Sah-Yojana (PM-MKSSY), ban wanrah ia ka jingkiew shaphrang ha kane ka kam.
Ha u Rymphang 2019, ka Sorkar India ka la sdang ia ka ‘Tnad Kam Ri Dohkha’ ba kyrpang bad ha u Jylliew 2019, ka ‘Tnad kam Ri Dohkha, Kam ri Jingri bad ka Kam kaba iadei bad ka Dud’ na ka bynta ka jingkyntiew kaba pura ia kane ka kam kaba kongsan, bad ruh ban kyntiew ia ka bha ka miat bad ka kamaikajih jong ki million ngut ki briew kiba trei ha ki kam kiba iadei bad ki dohkha.
Ki projek bad ki sienjam bapher bapher kiba la ioh jingmynjur na ka tnad Kam Ri Dohkha ki la kyntiew ia ka kam ri dohkha bad ki la kyntiew ia ka jinglah pynmih ia ki dohkha, ka bha ka miat jong ki nongridohkha bad ki jaitbynriew kiba shem jingeh. Kine ki skhim bad ki sienjam ki la don ka bynta kaba heh ha ka jingwanrahia ki jingkylla ia kine ki briew.
Ka thain shateilammihngika long kaba kongsan ha ka jingiaid lynti ka India sha ka jinglah pyndap ialade ha ki kam dohkha, bad ka dei ka dak jong ka jingkut jingmut jong ka Sorkar na ka bynta ka roi ka par ia baroh.
Namar ka jingbun ki jaka shong um bad ka jingbun ki jait jingim kiba im ha ka um, ka thain shateilammihngi ka dei ka thain kaba bun bha ki lad bad ka jaka pdeng jong ka roi ka par hapoh ka jingialam lynti jong ka Sorkar.
La ithuh ia kane ka thain kum kaba riewspah bha ha ki jingthung bad ki mrad, bad kumta kane ka thain ka long kaba kongsan bha ha ka rukom treikam jong ka India na ka bynta ka jingkiew ka ioh ka kot bad ka jingkyntiew ia ka kamaikajih.
Ka Sorkar ka la ai jingmynjur ia ki jingbei tyngka kiba kot sha ka T 2,114 klur na ka bynta ki jaka ri dohkha lyngba ki skhim kum ka Blue Revolution Scheme, kaFisheries and Aquaculture Infrastructure Development Fund (FIDF), bad kaPradhanMantriMatsya Sampada Yojana (PMMSY).
Kine ki sienjam ki la kyntiew ia ki jingdon jingem, ka jingseisoh bad ki la pynkhlain ia ki rukom treikam ba iaineh. Namar kane, ka jingpynmihdohkha ha ka thain shateilammihngi ka la kiewna ka 4.03 lak ton ha u 2014-15 sha ka 6.41 lak ton ha u 2022-23, kaba long ka jingkiew kaba 5% ha man u snem.
Kine ki jingjop ki dei ki dak jong ka jingseisoh jong ki polisi bad ki sienjam kiba la pynlong ia ka thain shateilammihngi kum ka thain kaba kongsan ha ka jing thmu Blue Economy jong ka India. Da kaba iohiia ki lad kiba bun ha ka kam ri dohkha, ka Tnad Kam Ri Dohkha ka la peit bniah ia ka thain shateilammihngi kum ka jaka kaba kongsan na ka bynta ka roi ka par.
Ki sienjam jong ka ki kynthup ia ka jingwanrah ia ki aquaculture park kiba katkum ka juk mynta, ki hatchery, bad ki fish processing unit, ha ryngkat ka jingpynshlur ia ki teknoloji kum kiBiofloc systembad kirecirculatory aquaculture system (RAS).
Kine ki sienjam ki thmu ban kyntiew ia ka jingseisoh, pynkhlain ia ki kam ba iasoh bad kyntiew ia ka jingioh ki nongridohkha ia ki iew. Ban pynbha shuh shuh ia ki kam ka tnad Kam Ri Dohkha jong ka Sorkar Pdeng ka la jied 47 tylli ki projek ha ka jingmang tyngka kaba T.1,661lakha kaba ka bynta jong ka Sorkar Pdeng ka long T. 878.63 lakbad ka dang plie lad ban ioh 2507tylli ki kam ban kyntiew ia ka kamaikajih bad kyntiew ruh ia ka jingim jong ki briew.
