Shillong, Kyllalyngkot 06: Ka Tnad kam ialehkai, Sorkar Meghalaya ha ryngkat ka jingiatreilang bad ka My Bharat, ka la pynlong ia ka jingialang bad ki lad pathai khubor ha ka jylla mynta ka sngi ha Shillong Press Club hashwa ban mih ka kynhun na Meghalaya na ka bynta ka Viksit Bharat New Leaders Dialogue (VBYLD 2026, ban long ha Bharat Mandapam, New Delhi, naduh ka 9 tarik haduh 12 tarik Kyllalyngkot 2026.
Haba ai jingkren sha ki lad pathai khubor, u D. D. Shira, Director ka Tnad kam ïalehkai, Sorkar Meghalaya, u la ai ka jingïathuhlyngkot shaphang ka Viksit Bharat Young Leaders Dialogue 2026, kaba dei ka bynta kaba ar jong ka National Youth Festival. U la pyntip ba ka jingïaid lynti jong ka VBYLD ka la sdang da ka online quiz ha baroh kawei ka ri kaba la pynlong ha ka rynsan My Bharat, ha kaba la sakhiïa ka jingïashim bynta jong palat 50 lak ngut ki samla na kylleng ka ri.
U la ong ba kumba 2.5 lak ngut ki nongiashim bynta ki la shah jied na ka bynta ka essay round katkum ki shiphew tylli ki phangpdeng jong ka Viksit Bharat Challenge, bad kumba 15,000 ngut ki samla ki la poi sha ka bynta ba kham halor ha ka Jylla. U la pyntip ruh ba la wanrah artylli ki bynta ba thymmai—Ka Hack for Social Change, kaba la pynlong ha kylleng ki Jylla bad ki Union Territory da ka IIT Bombay, bad ka Design for Bharat, kaba la pynlong da ka School of Planning and Architecture, New Delhi, ha kaba ki kynhun ba la shah jied kin iakhun ha ka national round.
U Shira u la pyntip shuh shuh ba la pynlong ïa ki jingïakop ha ki bynta tynrai ha kylleng ki 677 tylli ki district, ha kaba 954 ngut ki nongïashim bynta ki la poi sha ka national level ha ki bynta ba kynthup ïa ka jingshad bad jingrwai tynrai, ka declamation, poitri bad jingdrodur. U la bynrap ruh ba ha kane ka tamasa yn sakhi ruh ïa ka jingïashim bynta jong ki samla na India kiba sah shabar ri hapoh ka Know India Programme, ha ryngkat ki nongmihkhmat na ki ri BIMSTEC bad Nepal.
Haba kren shaphang ka bynta pdeng jong ka Youth Leaders Dialogue, u Shira u la bataiïa ki shiphew tylli ki phangpdeng jong ka Viksit Bharat Challenge, kiba kynthup ïa ka jingïashim bynta jong ki samla ha ka synsharpaidbah bad ka jingsynshar, ka roi ka par ba ïalam da ki longkmie, ka jingkoitjingkhiah bad ka kam ïalehkai, ka jinglong jingman jong ki start-up, ka bor jong ka India, ka jingsaindur thymmai bad ka ritidustur, Atmanirbhar Bharat, ka rep ka riang kaba neh, ka roi ka par kaba khuid bad ban tei ia ka bor treikam kaba la pynkhreh na ka bynta ka lawei.
Ha kane ka jingialang bad ki lad pathai khubor, la ioh ruh ka jingkren na u Bah Bobby Wahlang, State Youth Officer bad Nodal Officer na ka bynta ka Viksit Bharat Young Leaders Dialogue 2026, uba ialam ia ka kynhun na Meghalaya sha New Delhi. U la ong ba ka Viksit Bharat Young Leaders Dialogue ka dei ka bynta ba kongsan jong National Youth Festival 2026 ba 29 bad ka kynthup ïa saw tylli ki bynta ba kongsan—Ka Youth Leaders Dialogue, Cultural Tracks, Design for Bharat bad ka Hack for Social Change.
U Bah Wahlang u la pyntip ba ka jylla Meghalaya ka iashim bynta ha ki thup Youth Leaders Dialogue, Cultural Tracks bad Design for Bharat. Hapoh ka Design for Bharat track, arngut ki samla pule na ka National Institute of Technology, Shillong, u Nishant Kumar Singh bad ka Neeharika Singh, ki la shah jied ha ka ri baroh kawei na ka bynta ka jingsaindur thymmai jong ki, kata ka Smart Braille Watch. Ka dei ka tiar ba lah ban deng ha ka met, kaba la shna khnang ban iarap ia ki briew kiba don jingduna ka bor iohi ban tip ia ka por bad ki jingpynbna lyngba ka tactile Braille output, da kaba pynleit jingmut ha ka jingjemdor, ka jinglah ban kynriah bad ka jingsuk ban pyndonkam. Ki nongsaindur ki don mynta ha New Delhi ban pynkhreh ban pyni ia ka projek jong ki ha ka rynsan jong ka ri.
U la pyntip shuh shuh ba 25 ngut ki samla ryngkat bad saw ngut ki ophisarsorkar ki mihkhmat ia ka jylla Meghalaya ha ka Viksit Bharat Young Leaders Dialogue 2026. Ia kine ki delegate la jied lyngba ka rukom jied ba bun kyrdan kaba la sdang da ka online quiz kaba la pynlong ha u bnai Nailur– Risaw 2025. Na ka jylla Meghalaya, ki la don haduh 2,393 ngut ki samla kiba la iashim bynta ha ka quiz, na kine 475 ngut ki la poi sha ka essay round. Hadien ka jingjurip jong ki riewshemphang ha kane ka kam katkum ki jingbthah jong ka Tnad kam ialehkai, Sorkar India, 88 ngut ki samla na Meghalaya ki la poi sha ka bynta jong ka State Championship kaba la pynlong ha ka 13 tarik u Nohprah 2025, kaba la poi sha kaba kut ha ka jingjied ba khatduh jong ka ri baroh kawei.
U Bah Wahlang u la pyntip ruh ba 23 ngut ki samla na Meghalaya kin mihkhmat ia ka jylla ha ka jingrwai bad jingshad tynrai ha ka ri baroh kawei, katba lai ngut ki samla kin iashim bynta ha ki jingiakop declamation, poitri bad jingdrodur. Ia kine ki nongiashim bynta la jiednapdeng ki 1,000 ngut ki samla kiba la iashim bynta ha State-level Chief Minister’s Youth Engagement Programme kaba la pynlong ha NEHU naduh ka 2 haduh ka 5 tarik u Nohprah 2025.
Ka kynhun na Meghalaya, kaba kynthup kumba 50 ngut ki dkhot, ka la mih ban leit sha New Delhi mynta ka sngi bad kin poi ha katei ka nongbah, shwa ban sdang katei ka tamasa. Ha kane ka prokram kaba saw sngi, ki samla kin ïashim bynta ha ki bynta ban jied, ki jingïakren halor ki phang, ki jingïakren halor ka jinglong nongïalam, ki jingpyniïa ka kolshor bad ki jingpyni hakhmat ki kynhun jong ki riewshemphang. Ka prokram ka kynthup ruh ia ki jingleitjngoh, ki jingiakren bad ki riew pawkhmat jong ka ri. Ki samla kin ioh ia ka lad ban iakren bad u Myntri Rangbahduh ka ri u Narendra Modi ha kane ka tamasa, ha ka National Youth Day ha ka 12 tarik Kyllalyngkot 2026.
Ka Viksit Bharat Young Leaders Dialogue 2026 ka ïahap bad ka jingthmu jong ka Sorkar India na ka bynta ka Viksit Bharat 2047, kaba ialeh ban pynkylla ïa ka India sha ka ri kaba la kiewshuwa ka jingdapshispah snem jong ka jingïohjinglaitluid. Ka jingthmu ka phaikhmat sha ka roi ka par kaba ioh bynta lang, ka jingpynnehpynsah bad ka jingsynshar kaba treikam, ha kaba ki samla ki don ka bynta ba kongsan ha kaba pynwandurïa ka lawei jong ka ri.
