Shillong, Naitung 25: Mynta ka sngi ki pulit Enforcement ka KHADC ki la shah bom ha ki kynhun runar nongkhaii hapoh ka jingialam jong u Bah Paul Leong, u lok jong ka kong Deoris Marbaniang bad u Kimfa Marbaniang,uba dei u khun jong u,ha kaba 5 ngut ki enforcement ki la mynsaw, 2 ngut ki nongpathai khubor bad kawei ka samla Naga kaba dang 24 snem ka rta, kaba lajia ha lynti iaid kjat kaba sdang na dukan die juti Bata ban kiew sha Iewduh bad ha mar pyrshah ban rung sha State Bank of India, Iewduh Branch.
Napdeng 5 ngut, u Bah Poland Sohphoh uba long u Superintendent Enforcement u la mynsaw na ka bynta jong ki kti katba u dang iada ia la ki jong ki pulit enforcement bad ia lade ruh kumjuh haba kine ki runar ki la thmu ban bom ia u na ki bynta jong ka khlieh da u dieng tylli bad ba u la iada, ha kaba ki kti jong baroh ar ki mong bad jngemsnam.
Sa uwei uba la mynsaw jur udei u Teilang Thangkhiew, uba la mmynsaw na tmoh bad na ki bynta jong ki khlieh, kiwei pat ki enforcement kiba la mynsaw ki long u Bah Banker Kharkongor, M.Thongni bad u P.Kharbuli.
U bah Marcus Lyngdoh jong ka TV Channel jong ka T7 u la mynsaw na ki kti bad ka nongring Camera jong ka United Nation News (UNN), ka Riba Kharpran ka la shah bom na ki khohwah ha kaba ka la kynnoh ba kine ki runar ki la thmu ban knieh ia ka camera jong ka, kaba kim shym la ioh.
ka samla kaba dang 24 snem ka rta kaba kyrteng ka K. Sema kaba shong basah ha Nongpoh kaba la shu wan Shillong ban thied jingthied ka la shu shah bom ei khamakha khlem daw ha kine ki runar, kaba la mong jur na ki bynta ka khlieh.
Haba ai jingkren sha ki lad pathai khubor ka la iam pangnud halor kane ka jingjia ba sngewsih bad ka la ong ba ha ka por ba ka shah bom kam shym tip briew shuh ha kaba ka la sngew ba ka khlieh jong ka, ka la madan lut.
Katei ka jingjia ba sngewsih ka lajia ha ka por ba ki enforcement ka KHADC hapoh ka jingialam jong u Superintendent Enforcement, u Bah Poland Sohphoh ki la pynlong ia ka jingkhynra na ka bynta ki nongshong dukan die jingdie harud surok, kaba ki la phiah haduh 6 zone na ka bynta ban leit khynra ha kylleng ka nongbah, kaba dei kawei na ki sienjam jong ka ARPA kaba ialam ia ka KHADC kaba ki la thmu ban pynkylluid bad ban pynitynnat biang ia ka Iewduh kumba long ha ki por mynbarim.
Ha ka jingkhynra ba ki la pynlong ha Them Iew Mawlong, ki Enforcement ki la kurup ia ki tiar jong ki nongdie shana, ki nongdie CD, ki nongdie jain, ki nongdie torch light, ki nongdie khiew steel bad allumuniam bad kiwei kiwei, kiba shong ha lynti iaid kjat bad harud surok bah.Ka jingkhynra ka la long ka bajaijai, watla ki enforcement ki la thep ia ki tum ki tam hapoh ki trok rit, ym shym la don uwei ruh u nongkhaii bar jylla u ban ong eiei.
Hynrei ynda la poi ha ka Building jong ka kong Deoris Marbaniang ba la ju tip kum ka Nichols Roy building, ki enforcement ki la ong ia kawei ka dukan die pla ba kin weng ia ki pla jong ki, namarba ki tam sha surok, hynrei khlem don ba suidniew, ha kaba ki enforcement ki la weng hi ban buh shapoh jong kane hi ka dukan bad hamar kane ka por lawan uwei u bar jylla bad u Bah Paul Leong, uba laphah sangeh pynban ia ka trok rit bad hukum ia ki enforcement ba pynhap ia ki tiar.
Kaba la pynlyngngoh ia ki enforcement namar kim shym la thep ia ki tiar ki jong ki hapoh katei ka trok rit, te kumno kin pynhap bad ha kane ka por ka la don ka thma ktien hapdeng u bah Paul Leong bad ki enforcement kaba la khluit bha.
Hadien khyndiat minit, u Bah Poland u la ialam ia ki enforcement ban leit ban khang ia kawei ka dukan kaba don hapoh ka bulding jong ka kong Deoris ba la kynnoh ba ki la plie beain khlem laisen kaba don jingiadei bad ka rai ba la pynksan da ka High Court ba kadei ban khang khyrdep katba kim pat ioh ia ka Trading License bahap hapoh ki section 7A bad 7B jong ka Khasi Hills District, Trading By Non-Tribal Regulation, 1954. Kaba ong ba ki trai dukan kidei ban ioh Trading License haba ai wai ia ki bar jylla.
Dei hapdeng jong kane ka thma ktien ba la iania hapdeng u bah Paul leong bad u Superintendent ka Enforcement, ha kaba u bah Paul u la ktah kti nyngkong bad khynniat na shadem uwei u pulit enforcement uba don hajan jong u, mar ha kane ka por ka la mih kawei ka sur kaba ong “MARO” ym tip shuh kadei ka sur jongno namar ka jingbun ki paidbah ba la ialum ha kane ka jaka, hynrei la suba ba ka lah ban dei ka jong u bah Paul.
Mar kumta u bah Paul u la ktah kti sa ia u Bah Poland bad ki kynhun runar ba la i kumba ki la plan bad thmu sniew lypa ki la mih kynsan puk naei ym tip shuh ryngkat ki tiar pynmynsw ha ki kti jong ki, kum u dieng tylli, u siej, ka lyntang bad kiwei kiwei, ki la khie wahleng ha kaba ki la bom jem ia ki enforcement, ha kane jingjia la ngatlang ki nongtrei press bad kawei ka samla Naga.
Shiphang kane ka jaka ka la lyhuh phum ha kaba ki briew ki la panic bad mareh kulmar kat shaba lap bashem, ha kaba ka la don ka jingiakhynniat para briew kaba jur la don ruh kiba la ur mynsaw malu mala bad shiphang kine ki dukan ba marjan baroh ki la khang khyrdep lut na ka jingsheptieng.
Haba iadei bad katei ka jingjia, la pynkit noh ia kiba mynsaw baroh sha Civil Hospital na ka bynta ban ai ia ki jingsumar. Katba ia ka samla Naga la ialam hi da ka paralok jong ka ryngkat kaba haiing.
Kawei na ki Sengbhalang kaba dang seng thymmai ka Hynniewtrep Youth Council (HYC) hapoh ka jingialam jong u samla Donbok Kharlyngdoh, kaba don ia ka jingsngewkhia ka la poi ha Civil Hospital ban peit ia kiba la mynsaw.
Haba ai jingkren sha ki lad pathai khubor u Donbok u la pynrem jur ia kane ka jingjia bad u la ong ruh ba kin sa leit ia kynduh ia ki bor pyniaid District ba kidei ban kem mardor ia kiba donkti baroh, namar kane kadei ka jingpynjem rngiew ia ka Ri bad ka Jaitbynriew. Ha kaba ki bar jylla haduh katne ki la shlan ban ktah kti ia u para doh para snam ka jaitbynriew.
Haba iadei bad kitei ki jingjia ka KHADC lyngba u Secretary bad ka Shillong Press Club lyngba u President, Bah David Laitflang bad General Secretary, Bah Powel Sohklet ki la ai ia ka Ejahar pyrshah ia u Paul Leong bad ia u Kimfa Marbaniang ba la kynnoh ba dei ma ki, kiba la ialam ia ki kynhun runar ba bom ia ki pulit enforcement.
Ki pulit ka jylla mar ia ioh ia ka ejahar ki la kem ia u Paul Leong bad ia u Kimfa Marbaniang kumjuh ruh ia ki hynriew ngut ki bar jylla kiba la suba ba donkti bad ki dang iai pynlong ia ka jingtohkit ban thwet shuh shuh sa ia kiwei kiba donkti.
Ha kajuh ka por ka Khasi Student Union Sengkmie lyngba u General Secretary, Bah Augustar Jyrwa ki la pynrem jur ia kane ka jingjia ha kaba ka niew ia kane ka jingjia kum kawei na ki jingma kaba khraw na ka bynta ka ri bad ka jaitbynriew, ha kaba u bar jylla u la nud haduh katne ban bom ban shoh ia ki pulit enforcement kiba la leit ban khynra ha ka lynti kaba jaijai, ka ai mynsiem ruh ia ka KHADC ba kan ym sheptieng hynrei kan iai bteng ia ka jingkhynra jong ka.(SP News)
