Shillong 23 Iaiong: Kiba bun ki nongshong shnong ha Wahkhen ki la pynpaw ia ka jingsngew tynad ia ka jingsted treikam ka tnad pulit ka East Khasi Hills ban kyndang ia ki kam khalai beain ha katei ka shnong.
Ha ka kyrwoh ba la pynlait hynne ka sngi, ki nongshong ka Wahkhen ki la ong ba ka jingleh jong u SP ka East Khasi Hills Bah Mariahom Kharkhang bad u SP (Crime) Bah Vivek Syiem ka long kum ka nuksa ia kiwei pat ban kyndit bynriew shwa ban pynlong ia kum kine ki jait khalai ba long beain ha shnong Wahkhen kaba la pynlong naduh ka 19 tarik haduh 21 tarik Iaiong, 2014, ha kaba ki pulit ki la hiar ban kyndang ha ka 21 tarik ia kine ki kam beain khamtam ba khlem ioh bor na ki bor pyniaid district.
Lada ki la ioh bor na ki bor synshar district, ki pulit kin long pynban ki nongiada bad nongpahara ha kum kine ki jingleh sngewbha ym dei ba kin long ki nongkem kumba la jia ha katei ka 21 tarik.
Na ka liang ki nongshong shnong kim don satia kano kano ka jingshun ne pyrshah iano iano hynrei ban lait na kino kino kiba mut ban shim kabu da kumwei pat hapoh shnong, ban lait ruh na ki tien sih tien sang ne kino kino ki jingjia bym sngew tynnad kiba lah ban mih hapoh shnong”, la ong ki nongshong shnong.
Ki nongshong shnong kim don eiei ban pyrshah ia kino kino ka jingpynlong ia ki fete ba har rukom ban pynmih pisa ia kino kino ki jingthmu ba dei hok katkum ka lynti ba shong hok bad ba shong nongrim.
Kane kan long shisha kum ka jingsneng bad pynkyndit ia baroh khnang
ba nangne shakhmat kin tip bad bad nang kumno ban burom ia ki bor
pyniaid district ne pulit ym tang ha Wahkhen hynrei ha kylleng ki
shnong ne jaka hapoh ka ri jong ngi. “Ai ba kane kan long shisha ka
nuksa na ka bynta kiwei pat khamtam ha ki por ban sa wan”, la ong ki
nongshong shnong ka Wahkhen ha ka jingpynlait khubor mynta ka sngi.(SP News)
