Tura, Iaiong 19: Ka khlaw sorkar kaba don ha Rongrenggre kaba la tip kum ka reserved Forest ha dien ba la lap ba u don u dewiong ha kane ka jaka, ki briew kiba kwah spah jubor kila tam pud sha kane ka khlaw sorkar ban tih ia u tei u marpoh khyndew.
Kumba ka long mynta kane ka khlaw sorkar kala duh kumba 60 percent ka jingjyrngam ka jong ka na ka daw jong ka jingpom pathar ia ki dieng ki siej bad na ka jingtih dewiong hapoh kane ka khlaw sorkar.
Bun bah ki seng bhalang kila juh kren ia kane ka jingshah pynjot katei ka khlaw sorkar na ka por sha ka por ba ka don ka jingtih dewiong beain na katei ka jaka bad ka jingpom pathar ia ki dieng ki siej bad kane ka long ka jingma ia ka shnong Williamnagar namar ka jngai tang kumba 4 Km na katei ka sor.
U Senseng Marak, president jong ka seng Federation of Khasi, Jaintia and Garo People, jong ka shnat ha Williamnagar kila lap ba bun bah kane ka jaka sorkar la tam pud bad kaba bun ka dei ka jingtih ia u dewiong.
Chisim Marak, u wei na ki samla katei ka jaka u ba shong ba sah ha jan katei ka jaka u la ong ba kane ka khlaw sorkar la i kumba ym don ba peit ia ka naduh ba la lap ia u dewiong ha kane ka jaka bad ka jingtih ia u ka long ka jingma kaba khlraw ia ki umbam umdih ia ki shnong kiba don sawdong jong ka.
U Taison D Shira u la kynnoh ia ki bor sorkar ba ki khlem peit kat ia kane ka jingshah pynjop ha ka Mariang, la ong ba lei ki bor sorkar ki sngap jar jar ia kane ka jingleh ha kane ka khlaw sorkar.(SP News)
