Jowai, iaiong 19: Ki paidbah ka shnong Mukroh – ka shnong kaba ha khapud bad ka Karbi-Anglong, Assam ki la pynpaw ia ka jingsyier na ka daw ba ki pulit Assam ki la wan iaid swari ha katei ka shnong kaba la jia naduh ka 4 tarik une u bnai kat haduh mynta
`Ngim tip kaei ka daw ba kitei ki pulit ki la wan iaid pahara hapoh ka shnong ka thaw jong ngi`, la ong u rangbah shnong barim katei ka shnong, u bym shym la kwah ban pynpaw kyrteng. Kane ka jingwan rung be-ain ki pulit Assam kiba la kieng a tiar bha ka la sdang naduh ka 4 tarik une u bnai, la iathuh ki riew rangbah na katei ka shnong.
Ki paidbah khamtam ki riew rangbah kila dap da ka jinglynngoh kaba khraw khamtam hadien ba kitei ki pulit kiba ym duna ia ka 15 ngut eiei ki la wan shapoh shnong Mukroh bad ki la tih thiliew kaba shiphut sawdong kaba jylliew haduh kumba 4 lane 5 phut eiei bad ki la tep hapoh katei ka thliew ia uwei u kynja tiar u bym lah ban tip u dei u tiar aiu.
`Ngi la wan jurip ia iatei ka jaka bad ngi la lap ba kitei ki pulit Assam ki la thoh ia ki dak lyngkot ki bym da shai bha ha uwei u dieng ba la sieh ha katei ka jaka ba la tih bad tep ia utei u tiar u bym lah satia ban tip u dei u ei`, la iathuh utei u Rangbah shnong barim.
Na ka liang ki riew rangbah ki la kyntu ia ka sorkar Meghalaya ban shimkhia ia kane ka jingwan rung be-ain bad leh trai khlieh kitei ki pulit Assam hapoh shnong poh thaw bad ruh ki la kyntu ia ki bor pulit ban wan jurip ia katei ka jaka ba la tep ia utei u kynja tiar ha katei ka jaka(SP News)
