Nongpoh, Lber 14:Ka RBYDSO Central Body pynpaw ka jingsngew lyngngoh halor ka jingbym lah ka District Selection Committee (DSC) Ri Bhoi District ban pynmih ia ka resod thungkam ia ki post ba kynthup ia ka Gram Seveka, Demonstrator bad kiwei kiwei kiba la dep pynlong ia ka interview bad exam na bynta kitei ki post naduh u snem 2010-11 lyngba ka DSC Ri Bhoi.
“Hynrei kaba sngew lyngngoh ka long ba haduh mynta la lai snem tam ka DSC kam shym la pynmih ia katei ka resod thungkam,” la ong u samla D Malai, President RBYDSO Central Body
U la iathuh ba ka seng ka la ioh ia ka jingud jingnam na ki samla bad kiba haiing hasem jong kito kiba la pyndep ia ka interview bad ka Exam ia ki post bapher bapher kiba la pynlong da ka DSC Ri Bhoi District na bynta ban thungkam ia ki samla ha ki tnad treikam bapher bapher ka sorkar Jylla hapoh ka District.
Shuh shuh utei u heh nongialam ka seng ula ther tyngeh ia ka DSC Ri Bhoi halor ka jingbymlah jong ka ban ai ia ka resod ha ka por ba kaba biang, kane ka jingleh jong ka DSC ka la long pynban kum ka jingpynduhlad ia ki samla wad kam wad jam da kaba pynslem ia ka por haduh ar ne lai snem, namar ka jingpynslem ia katei ka resod thungkam ka pynsah umdum ia ki samla kiba la pyndep ia katei Exam namar haduh mynta kim tip la kin duh ne kin ioh ia katei ka kam kaba wanrah ia ka jingthurmur ha ki jingmut jingpyrkhat jongki la kin ap sah ia katei ka resod ne kin pyrshang ha kiwei pat ki kam.
Kumta, kum ka seng ka la kyntu jur ia ka Deputy Commissioner kaba long ka Chairman jong ka DSC ba kan pyllait noh mardor ia katei ka resod khnang ba kan long ka jingtip kaba shai ia ki samla kiba la pyndep ia katei ka exam la ki ioh ne ki duh.
Ha kawei pat ka liang ka seng ka pynrem jur ia ka sorkar Jylla halor ka jingpynslem ban pyllait resod thungkam thungjam la ka long ha District Level ne State Lavel, kane ka sakhi ym tang ha DSC Ri Bhoi hynrei ka jia ruh na ka por sha ka por ha ka MPSC kaba dei ka tnad thungkam thungjam kyllum jong ka sorkar Jylla.
Kum ban shu pynkymmaw ka sorkar Jylla kaba la khot ban thungkam lyngba ka MPSC ha u snem 2008-09 ia ki post kynthup Inspector, Clerk bad kiwei kiwei haduh mynta ruh ki dangdon ki bym pat ioh ia ka resod naduh kitei ki snem.
Ka seng ka kyntu jur ia ka sorkar Jylla ba kam dei ban pynslem ban pyllait ia kano kano ka resod thungkam palat ia ka 2 ne 3 bnai hadien ka Exam.(SP News)
