Shillong, Lber 04: U symbut myntri rangah ka jylla u bah Prestone Tynsong ba dei peit ia ka tnad District Council Affair u la pan pisa na ka iing dorbar T.14 Klur tyngka na ka bynta ban pynlut ha kaba pynlong ia ka elekshon MDC sha ka iing dorbar jong ka Garo Hills Autonomous District Council.
Ka jinglut na ka bynta ki MDC election dei ban lut da na ka District Council kaba don ka elekshon hynrei namar ba ka Garo Hills Autonomous District kam don pisa shuh ka sorkar jylla kan dang pynlut bad ia ka jinglut yn sa pynbeit na ka musur kaba ki dei ban ioh.
Ki District Council ki ioh ia ka musur jong ki na kaba lum na ki mar khlaw, ki kali, kaba la pynlum da ka sorkar jylla bad ia sam pat ia ka bhah kaba dei jong ki District Council, haba phai sha ka GHADC ka sorkar ka dang dep ai kumta kam don pisa shuh.
Kane ka pisa kaba T.14 klur tyngka ka long kaba don kam ban pynlong ia ka elekshon MDC sha GHADC ia kaba la pynlait da ka iing dorbar thawain ka jylla ha kane ka dorbar mang tyngka kaba dang shudep.
