Ha ka 15 tarik Naiwieng yn ia kynduh biang halor ka ILP

Shillong, Risaw 31: Ka High Level Committee on Influx jong ka sorkar jylla kaba la iakynduh hynne ka sngi kam shym la lah satia ban shim ia ka rai la kan ai jingmut ia ka sorkar ban pyntreikam da ka Inner Line Permit (ILP) ne da ka 3-Tier Identity Card system ha kane ka jylla.

Haba iakren bad ki nongpathai khubor u khliehduh jong kane ka Committee u bah Bindo M Lanong ula ong ba ia ka Inner Line Permit kaba la pynshong nongrim lyngba ka Bengal Frontier Regulation Act, 1873 yn ym lah ban pyntreikam hapoh ka ri lum Garo Hills, kane ka kynhun kan shong pyrkhat biang ha ka 15 tarik u Naiwieng 2012 ban iatai sani bad ban ioh ia ka jingai jingmut na ki riewshemphang ha ka ain la ia ka ILP lah ne em ban pyntreikam ha Garo Hills.

“Ngi kwah ba kine ki riewshemphang kin ai ka jingbatai kaba bniah ha kaba iadei bad ki kyndon ain kiba iadei bad ka Bengal Frontier Regulation Act, 1873. Ngi kwah ruh ba ki riewshemphang kin ai ia ki jingmut ia kaei ka lad ka lynti ba ka sorkar kadei ban leh na ka bynta ban pyntreikam ia ka ILP ha ri lum Garo” la ong u bah Bindo M Lanong.

U bah Lanong, ula ong ba mynshwa ka ri lum Garo ka hap hapoh ka ILP, hynrei kane ka thain kala lait noh hadien ba la pynkylla ia ka ain ha u snem 1897. Kumta ia mynta hi ym pat lah ban pyntreikam pura ia ka ILP ha ka jylla namar ba ka ri lum Garo kan hapoh hapoh ka ILP.

“Ka jingshisha ka long ba ki paid na ri lum Garo kin hap ban ioh ia ka “permit” ban leit rung sha ki bynta jong ka jylla kaba ki dei trai jylla lada la pyntreikam ia ka ILP ha ka jylla” la ong u bah Lanong.

Nalor kane ula pynpaw pat ba ia kane ka kam lah ban pynbeit hadien ba kala don ka jingia phylliew jingmut bad ki riewshemphang ha ka ain.

Ha kaba iadei bad ka jing bym lah ban pyntreikam ia ka ILP ha Garo Hills, u bah Lanong ula iathuh ba na ka liang u Chief Executive Memebr ka Garo Hills Autonomous District Council(GHADC) u PK Sangma ym shym la pynpaw ia kano kano ka jingpyrshah lada pyntreikam ia ka ILP ha ka jylla hynrei ula ong pat ba ym dei ban klet ia ka ri lum Garo.

U bah Lanong ula ong ruh ba ki nongiashimbynta ha kane ka jingialang kila pynpaw ba dei ban pyntreikam noh ia ka Inner Line Permit (ILP) hynrei la don ruh kiba pynpaw ba dei ban pyntreikam da ka 3-Tier Identity Card system kum kawei na ki lad ban pyrkhing ia ka jingwan rung kyrthep ki bar jylla.(SP News)

What Next?

Related Articles

Leave a Reply

Submit Comment
*