Jowai, iaiong 16: Ka pakhang shnong kaba 24 kynta kaba la khot da ki seng bhalang na East Jiantia Hills kala sdang mynta ka sngi ha ka por san baje mynstep bad haduh mynta kane ka pakhang shnong kala iaid beit khlem don kano kano ka jinghuri hura.
Katei ka surok bah NH-44 kaba pyniasoh ia ka bynta jong ka jylla Assam bad ia kiwei ki jylla kum ka jylla Tripura bad Mizoram kala thylli mynta ka sngi ha kaba ym don kali ba iaid ba ieng. Kat haduh ba thoh ia kane ka khubor ka pakhang shnong kala iaid beit bad kam shym don kano kano ka jingjia ba sngewsih.
Ki san tylli ki seng bhalang kiba dei na East Jaintia Hills District kila khot ia kane ka pakhang shnong kaba 24 kynta ka long ban dawa na ka sorkar ba ka dei ban pynbha noh ia ka surok NH-44 kaba la sniew sha ba palat. Na ka liang jong ki seng bhalang kila dawa na ka por sha ka por hynrei ka sorkar kam shym la sngew sngap satia.
Kumban shu pynkynmaw ban a ka liang jong u myntri ba dei peit ia ka tand shna surok u Bah Sngewbhalang Dhar u la leit hi da la de ban jurip ia kane ka surok, hynrei na ka liang jong ka sorkar kam shym la lah ban leh ei ei haduh kine ki sngi.
Na ka liang jong ki seng bhalang kim don lad da kumwei pat ban pynbor ia ka sorkar ba ka dei ban leh ei ei na ka bynta kane ka surok kim ban seng ban khot ia kane ka pakhang shnong ban pynsngew sha ka sorkar ia ka jingeh ki paidbah katei ka thain.(SP News)
