Guwahati Lber 24: U myntri rangbah ba mynshuwa jong ka jylla Assam u Prafulla Kumar Mahanta u la ong b aka seng Assom Gana Parishad (AGP) ka pyrshah jur ban pass ia ka Bill hapoh parliament ban ai ia ki jaka jong ka jylla Assam sha ka Bangladesh kumba la ia soi da u myntri rangbah duh jong ka Ri u Dr Manmohan Sing bad ka myntri rangbah duh jong ka Bangladesh ka Sheikh Hasina haka 11 tarik Risaw jong u snem 2011.
Kane ka Bill mynta ka la don hapoh Parliament na ka liang jong ka AGP ka la leit ban ia kynduh ia ki nongialam ka liang pyrshah ka seng BJP bad ia ka seng Trinamul Congress ban nym ailad ba kane ka bill kan pass hapoh pariliament. Lada pass ia kane ka bill kan ktah ia ka jylla Assam, West Bengal bad ka jylla Meghalaya.
Katkum katei ka jingiateh kular hapdeng ka India bad ka Bangladesh ka long b aka India kana ia sha ka Bangladesh 111 tylli ki jaka sha ka Bangladesh bad ka Bangladesh kana i sha India 51 tylli. Lada ia ka bill la pass ha parliament ki nong India kiba don haduh 37,334 kiba dei ki nong India kin sa kylla nong Bangladesh bad ki Bangladesh kiba don 14,215 ngut kin sa kylla nong India.
Na ka liang jong ka seng AGP ka pyrshah ia ka jingwantuid jong ki mynder ri bad ka kwah ba ia u pud u sam bad ki jaka jong ka jylla Assam ym dei ban ai sha Bangladesh. Kumba ka long mynta na ki seng sain pyrthei ha kane ka Ri India kiba don ia ki dkhot ha Parliament kiba pyrshah ia kane ka jingleh jong ka sorkar Congress dei tang ka BJP, TMC bad ka AGP, la ong u Mahata.(SP News)
