New Delhi, Naitung21: U myntri ka pla pisa jong ka sorkar pdeng u Arun Jaitley u la ong ba ka jingioh kaba bun eh kaba ka sorkar kan sa ioh ha kane ka snem mang mynta 2014-2015 kan long na ka khajana na ki heh spah ia kaba la tip kum ka Direct Tax. Kane ka thong na ka bynta u ne u snem ka long ban pynmih T. 7,36,221/- klur tyngka. Ia kane u myntri u la kren ha ka jingialang jong ki ophisar jong ka tand Income Tax.
U myntri ka tand pla pisa jong ka sorkar pdeng u la ong ba ka sorkar kan nym shong kli kti ha kane ka bynta bad kan trei tyngeh ban wanrah biang ia ka pisa beain jong ka Ri kaba la buh rieh sha bar jong ka Ri, ha ka juh ka por u la kyntu ba ki ophisar ki dei ban peit ruh ba ia kane ka pisa beain kaba don hapoh jong ka ri ruh dei ban lap ia ka jingkhein.
Kane ka jingialang kaba ar sngi ka long ka jingialang kaba la juh pynlong man u snem na ka bynta jong ki ophisar kiba trei hapoh jong ka Income Tax Department ha kane ka jingialang kiba la ia don lang ki long u Shaktikant Das, Revenue Secretary, u G.S. Sandhu, Secretary, Financial Services, u Ravi Mathur, Secretary (Disinvestment), Chairman bad dkhot jogn ka CBDT,bad kiwei ki heh kila ia don lang.
Ha kine ki ar sngi kine ki heh jong ka tand Income Tax kin ia kren kumno ban wanrah ia ka jingkylla ha ka rukom lum ia ka khajana na ki heh spah bad kin pyrshang katba lah ban lait na ka jingshah ai mukotduma ha dien ba ki la leh ia ka kam ka jong ki.(SP News)
