Shillong, Naiwieng 11: Ka kynhun ba la ialam da u Bah John F Kharshiing, Co-Chairman, MIDC, Chairman, The Grand Council of Chiefs of Meghalaya, Spokesperson, Federation of Khasi States, Bah Harlinjai Skhemlon, Sirdar Hima Mawdon, Secretary Federation of Khasi States, bad u Bah Hamphrey Lyngdoh Ryntathiang, Lyngdoh Hima Lyngiong, Joint Secy, Federation of Khasi States, na ka Grand Council of Chiefs of Meghalaya, (kynthup ka Dorbar Ki Khlieh Nongsynshar, Federation of Khasi States, Sirdarship, Dolloi bad Nokma) ki la ia kynduh kyrpang ia u Shri. Mukul Roy, MP Chairman, Trinamool Congress Parliamentary Group ha Shillong.
Ha kane ka jingiakynduh na ka liang jong ki khlieh nongsynshar ki la ai khublei ia u halor ka shithi kaba 5 tarik u kyllalyngkot 2012, kaba u la phah sha u P Chidambaram, Home Minister barim ka Ri India, ban pan jingshai na ka tnad Ministry of Home Affairs, Sorkar India halor ki dulir ki jingiateh bad jingkular(Instrument of Accession and Annexed Agreement 17 August, 1948).
Na ka liang u Bah John F Kharshiing, Chairman, Grand Council of Chiefs of Meghalaya, bad ki Khlieh Nongsynshar kiba la ia don lang, ki la kyrpad ia u Shri. Mukul Roy, MP ban kyrshan ia ki jingdawa jong ki Khlieh Nongsynshar ban pynsngew lem sha ka Sorkar India , bad khamtam ynda wan ki jingiakren hapoh Parliament, khamtam namar ba ka synshar hapoh Ri India mynta ka long ka synshar khleh khawlang.
Ha kane ka jingiakynduh u Shri. Mukul Roy, MP, TMC u nongialam ka Trinamool ha Parliament u la ong ba ka TMC ka long kaba kloi ban kyrshan ban pyndep ia kitei ki jingkular bad ki jingiateh ynda ka wan ka jingtyrwa bad ka jingiakren hapoh Parliament ka Ri India.
Ha kaba iadei bad kane u la kyrpad ia ki Khlieh Nongsynshar ban wan sha nongbah Delhi ha ka parliament session kaban sa long khnang ba kin ioh ban ia kren kham bha halor kane ka kam.
U Bah H Skhemlon, Sirdar Hima Mawdon, Secretary, Grand Council of Cheifs bad Secretary, Federation of Khasi States, ha ka jingiakren bad u Shri. Mukul Roy, MP u la pynpaw ruh ia ka jingeh kaba ki paidbah bad ki khlieh Nongsynshar ki ia shem namar ka jingbym plie ia baroh ki Hat (Iew) border kiba don sha ki thain Indo-Bangla ha jylla Meghalaya. U la kyrpad ia u ne u nongialam jong ka seng TMC ban shim khia bad ban ia kren lem halor kane ka kam.(SP News)
