Tura, Naiwieng 16: Ki dkhot jong ka seng ANVC kiba la wan sha ka miej jingiakren ia suk bad ka sorkar ha u snem 2004 baroh ki don 163 ngut bad kine ki sah ha ki jaka bapher bapher kiba la buh da ka sorkar. Hynrei mynta la khyndai bnai ka sorkar kam shym la siew ia ka bai bam ka jong ki kaba ki dei ban ioh T.3000 tyngka man u bnai.
Na ka liang jong ki nongialam jong ka ANVC ki ong ba kane ka jingleh jong ka sorkar kan ktah ia ki ba bun ki dkhot jong ka seng bad kane ka la paw na ka jingleh jong u wei na ki dkhot ha ba leit ban iarap ia ka GNLA. Na ka liang jong ki nongialam jong ka seng ki la ia kren ia kane bad ka sorkar hynrei ym lah ban tip na kiei ki daw ba haduh mynta kim pat pynlait ia ka pisa.
Na ka liang jong u Political Secretary jong ka seng u Malja A Sangma u la ong ba ha ka jingiakren bad u myntri rangbah ka jylla u sngewthuh ia ka jingdon kam ka jong ki hynrei kaei kaba pynlong pat ia ki heh sorkar ba kinpyn slem namar kane ka jingbym ioh pisa ka jong ka long naduh u bnai Rymphang mynta u snem.
La ong ba ha ka jingiakren bad u K S Kropha principal secretary jong ka sorkar jylla u la ong ba yn sa pynlait ia kane ka pisa shuwa ka Durga Puja hynrei haduh kine ki sngi ka sorkar kam pat pynlait ia kane ka pisa.
Na ka liang jong ki nongialam jong ka seng ki sngewkhia ia kane ka bynta namar ba ka por leh kmen Khrismas ka la jan bad ka jinglong ha Garo Hills ka long ka bym da shngian kane ka jingleh jong ka sorkar kan dang ktah shuh shuh ia ki dkhot jong ka seng bad kan ktah ruh ia ka jingiakren ia suk. (SP News)
