Shillong, Nailar, 01: Ki 13 tylli ki Sengbhalang kiba la iakynduh lang mynta ka sngi, ki la rai ban ym don bynta ha ki 3 tylli ki Committee kiba la thaw da ka Sorkar ban pyntreikam ia ki jingai jingmut jong ki 13 tylli ki Sengbhalang.
Ki la shim ruh ia ka rai ba kin ai jingthoh sha u Chief Minister jong ka jylla u Dr Mukul sangma halor kine ki committee ba ka sorkar ka dei ban ai ia ka report jong kine ki lai tylli ki committee sha ki sengbhalang ha ka arsien shibnai.
Ka jingpan jong ki ia ka report na ka sorkar halor kine ki Committee ka long ba kin peit thuh ia ka rukom trei kam bad ka jingiaid jong kitei ki Committee bad ban ioh bishar bniah kumno kine ki committee ki long.
Ki ne ki 13 tylli ki seng bhalang ki lashim ruh sa ia ka wei pat ka rai bad kata ka long ba kin ym treh ban leit mih ha ka iing bishar special court halor ka jingshah jong ki ka ban long ha ka 8 tarik mynta u bnai.
Kine ki sengbhalang kin pynlong ia ka jingialang paidbah ha baroh ki district ban pynshai bad ban pynsngewthuh khambha ia ki paidbah baroh ia ka nongrim halor ka Inner Line Permit(ILP) bad ia ki tarik ban pynlong jingialang yn sa pynbeit ha kine ki sngi.(SP news)
